भांगरभूंय | प्रतिनिधी
नवी दिल्ली, खबरां संस्था ः भारत सरकारान 2024 मेरेन देशांतल्या दरेका गांवांतल्या दरेका घरांत नळाचें उदक पावपाचे लक्ष्य दवरलां. 15 ऑगस्ट 2019 मेरेन देशांतल्या फकत 16.81 टक्के गांवांतल्या घरांनी नळाचें उदक आशिल्लें, जें आतां 25 डिसेंबर 2023 मेरेन 72.29 टक्के जालां.
पूण गांवगिऱ्या वाठारांतली सुमार 28 टक्के घरां अजूनय नळाच्या उदकाची वाट पळयतात. गांवगिऱ्या वाठारांनी सुमार 5.33 कोटी घरांक नळाच्या उदकाची जोडणी ना. हे बाबतींत राजस्थान, झारखंड आनी अस्तंत बंगालांतली परिस्थिती चड वायट आसा.
गांवगिऱ्या वाठारांनी वट्ट घरांची संख्या 19,25,17,015 (19.25 कोटी) आसा. तातूंतल्या 13,91,70,516 (13.91 कोटी) घरांनी नळ बसयल्यात. आरटीआय कायद्या खाला दाखल केल्ल्या अर्जाक जाप दितना पेयजल आनी नितळसाण मंत्रालयान ही म्हायती दिल्या.
सरकारान राज्य सरकारांक कोटी रुपया दिल्यात
भारत सरकारान 2024 मेरेन देशांतल्या दरेका गांवांतल्या घरांत नळाचें उदक दिवपाचें लक्ष्य थारायलां, जाचे खातीर ‘हर घर जल’ येवजण चालीक लायतात.
मंत्रालयाच्या जाप प्रमाण पिवपाचें उदक हो राज्याचो विशय आसून पिवपाच्या उदका पुरवण येवजणेचे नियोजन, आराखडो, मान्यताय आनी चालीक लावपाची जापसालदारकी राज्यांचेर आसा. भारत सरकारान तंत्रीक आनी अर्थीक मजत दिवन ह्या वावरांत राज्यांक आदार दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
