भांगरभूंय | प्रतिनिधी
मुंबय, खबरां संस्था ः देशभरांतल्या प्राथमिक शिक्षकां मदीं पन्नास टक्क्यां परस चड शिक्षक डिप्लोमा, पदवी अशे उण्यांत उणे पात्रताय निकश नाशिल्ले आसात. चडशा शाळांनी ते विशय शिकोवपा खातीर गणित, विज्ञान आनी इंग्लीश विशयांतले पदवीधर शिक्षक नात, अशें टाटा इन्स्टिट्यूट ऑफ सोशल सायन्सेस हांणी केल्ल्या अभ्यासांतल्यान स्पश्ट जालां.
हालींच असराच्या अहवालांत विद्यार्थ्यांच्या शिक्षणीक उणावाचे पुरावे मेळ्ळ्या उपरांत देशभरांतल्या शाळांनी शिक्षकांची स्थिती चड बरी ना अशें टाटा इन्स्टिट्यूट ऑफ सोशल सायन्सेसाच्या सेंटर फॉर एक्सेलन्स इन टीचर्स एज्युकेशनान केल्ल्या अभ्यासांतल्यान दिसून आयलां. देशभरांतल्या फकत 46 टक्के प्राथमीक शिक्षकांनी पदविकाधारक (डीएड) वा पदवीधारक(बीएड) आसात. खाजगी शाळांनी अपात्र शिक्षकांचो आंकडो तुळेन चड आसा. ज्या विशयांत पदवी शिक्षण मेळयलां तेच विशय शिकोवपाची संद 68 ते 70 टक्के शिक्षकांक मेळ्ळ्या तरी गणित, विज्ञान आनी इंग्लीश विशय शिकोवपा खातीर शिक्षकांचो उणाव आसा. ते खातीर गणित, विज्ञान वा इंग्लीश शिकोवपा खातीर बिगर पदवीधर शिक्षकांची नेमणूक केल्या. हे विशय शिकोवपी शिक्षकां मदीं 35 ते 40 टक्के शिक्षकांक गणित, विज्ञान, इंग्लीश विशयांची पदवी ना.
खाजगी शिक्षणीक संस्थांनी आशिल्ल्या शिक्षकांच्या वट्ट संख्येंतल्यान 40 टक्क्यां परस चड शिक्षक खाजगी शिक्षणीक संस्थांनी काम करतात. थंय तांकां बऱ्यो सुविधा मेळटा. पूण, खाजगी संस्थांनी शिक्षकांक अल्प पगाराचेर काम करचें पडटा, अशें दिसून आयलां. पन्नास टक्क्यां परस चड शिक्षकांक कसलीच हमी वा कायदेशीर कंत्राट नासतना काम करचें पडटा.
शारिरीक शिक्षण, कला विशयांचेर दुर्लक्ष
खाजगी शाळांचे तुळेंत शारिरीक शिक्षण, कला, संगीत हांचे कडेन आडनदर जाता. शारिरीक शिक्षणा खातीर 36 टक्के सरकारी शाळांनी शिक्षक आनी 65 टक्के खाजगी शाळांनी शिक्षक आसात. कला हो आनीकय दुर्लक्षीत विशय आनी 20 टक्के सरकारी आनी 57 टक्के खाजगी शाळांनी शिक्षक आसात. संगीता खातीर 12 टक्के सरकारी शाळांनी आनी 39 टक्के खाजगी शाळांनी शिक्षक आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
