भांगरभूंय | प्रतिनिधी
नवी दिल्ली, खबरां संस्थाः देशांतल्या सुमार 44 टक्के शारांनी वायु प्रदुशणाक लागून समस्या निर्माण जाल्यात. सेंटर फॉर रिसर्च ऑन एनर्जी अँड क्लीन एअर (CREA) हे संस्थेन सॅटेलायट डेटाच्या मजतीन देशांतल्या 4,041 शारांनी PM2.5 प्रदुशणाचेर संशोधन केलें.
संशोधन प्रमाण मेघालयांतलें बर्नीहाट, दिल्ली आनी गाजियाबाद हीं देशांतलीं सगळ्यांत चड प्रदुशीत शारां आसा. ह्या शारांनी प्रदुशणाची समस्या एक-दोन दिसांची न्हय, तर वर्सभर आसता. वाहनां, कारखाने आनी हेर कारणांक लागून हांगां सेगीत प्रदुशण आसता.
2019 ते 2024 ह्या काळांत दर वर्सा उण्यांत उणें 1,787 शारांनी PM2.5 ची पातळी थारायिल्ले मर्यादे परस चड आसता अशें अहवालांत म्हणलां.
भारतांतलीं 44 टक्के शारां ‘क्रॉनिक एअर पॉल्यूशन’ म्हणल्यार सेगीत वायु प्रदुशण ह्या श्रेणींत येतात. ते भायर ह्या शारां मदली फकत 4 टक्के शारांचो आस्पाव नॅशनल क्लीन एअर प्रोग्राम (NCAP) हातूंत आसा.
2025च्या आंकडेवारी प्रमाण मेघालयांतलें बुर्नीहाट हें सगळ्यांत चड प्रदुशीत शार. हांगां PM2.5 ची सरासरी दर घन मीटराक 100 मायक्रोग्राम आशिल्ली. ताचे उपरांत दुसऱ्या क्रमांकाचेर दिल्ली (96) आनी गाजियाबाद (93) तिसरे सुवातेर आसात. नोयडा चवथ्या क्रमांकाचेर आसा. हे वळेरेंत गुरूग्राम (हरियाणा), ग्रेटर नोएडा (युपी), भिवाडी (राजस्थान), हाजीपूर, मुजफ्फरनगर आनी हापूर हांचोय आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
