भांगरभूंय | प्रतिनिधी
नवी दिल्ली, खबरां संस्थाः देशांतल्या 30 मुख्यमंत्र्यां मदल्या 12 म्हणल्यार 40 टक्के मुख्यमंत्र्यांचेर गुन्यांवकारी खटले नोंद आसात. तातूंतल्या 10 म्हणल्यार 33 टक्के मुख्यमंत्र्यांचेर खून करपाचो यत्न, अपहरण, लांचखोरी अशें गंभीर गुन्यांव नोंद जाल्यात.
तेलंगणाचे मुख्यमंत्री रेवंत रेड्डी हांचे आड सगळ्यांत चड 89 गुन्यांव नोंद आसात. वेंचणूक सुदारणां खातीर वावुरपी एनजीओ असोसिएशन फॉर डेमोक्रेटिक रिफॉर्म्स (एडीआर) च्या अहवालांतल्यान ही म्हायती मेळ्ळ्या.
सरकारान तीन विधेयक मांडल्यात, जाचे खाला गंभीर गुन्यांवकारी आरोपांत 30 दिसां खातीर अटक केल्ले प्रधानमंत्री, मुख्यमंत्री आनी मंत्र्यांक पदा वयल्यान अपात्र थारायतले अशा वेळार हो अहवाल आयलां.
एडीआरान राज्य आनी केंद्र शासीत प्रदेशांच्या सगल्या 30 आताच्या मुख्यमंत्र्यांच्या प्रतिज्ञापत्रांचें विश्लेशण करून हो अहवाल तयार केला. फाटली वेंचणूक लढोवचे पयलीं दाखल केल्ल्या प्रतिज्ञापत्रांतल्यान हो डेटा घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
