भांगरभूंय | प्रतिनिधी
नवी दिल्ली खबरां संस्था: देशांतल्या ३०२ मंत्र्यांनी (सुमार ४७%) आपल्या आड गुन्यांवकारी खटले आशिल्ल्याचें कबूल केलां. तातूंतल्या १७४ मंत्र्यांचेर खून, अपहरण, बायलां आड गुन्यांव अशे गंभीर आरोप आसात. तशेंच केंद्र सरकारांतल्या ७२ मंत्र्यां मदल्या २९ (४०%) मंत्र्यांनी आपल्या आड गुन्यांवकारी केशी आशिल्ल्याचें कबूल केलां. ही म्हायती ‘असोसिएशन फॉर डेमोक्रेटिक रिफॉर्म्स’ (एडीआर) हे वेंचणूक सुदारणा संघटनेच्या अहवालांत उजवाडाक आयल्या.
एडीआरान २७ राज्यां, ३ केंद्रशासीत प्रदेश आनी केंद्र सरकारांतल्या वट्ट ६४३ मंत्र्यांच्या प्रतिज्ञापत्रांचें विश्लेशण केलें.
एडीआरान अशेंय म्हणलां, ज्या प्रतिज्ञापत्रांच्या आधारार अहवाल तयार केला तें २०२० ते २०२५ मजगतींचे वेंचणुके मजगतीं दाखल केल्ले. ह्या प्रकरणांची स्थिती बदलपाकूय शकता.
केंद्र सरकारान हालींच एक प्रस्ताव मांडिल्लो. जातूंत अशें म्हणलां, गंभीर गुन्यांवकारी प्रकरणांत अटक जाले उपरांत ३० दिसांनी प्रधानमंत्री, मुख्यमंत्री आनी मंत्र्यांक तांच्या पदावेल्यान काडचे.
कांय मुखेल पक्षांच्या फुडार्यांची भुमिका
भाजप : ३३६ मंत्र्यां मदल्या १३६ (४०%) मंत्र्यांचेर गुन्यांवकार खटले आसात, जाल्यार ८८ (२६%) मंत्र्यांचेर गंभीर आरोप आसात.
कॉंग्रेस: ६१ मंत्र्यां मदल्या ४५ (७४%) मंत्र्यांचेर गुन्यांव दाखल आसात,जाल्यार १८ (३०%) मंत्र्यांचेर गंभीर आरोप आसात.
द्रमुक: ३१ मंत्र्यां मदल्या २७ (८७%) आरोपी आसात, जाल्यार १४ (४५%) मंत्र्यां आड गंभीर गुन्यांव आसात.
टीएमसी : ४० मदल्या १३ (३३%) लोकांचेर खटले आसात, जाल्यार ८ (२०%) लोकांचेर गंभीर आरोप आसात.
तेलुगू देसम पार्टी (टीडीपी): २३ मदल्या २२ मंत्री (९६%) आरोपी आसात, जाल्यार १३ (५७%) मंत्र्यां आड गंभीर गुन्यांव दाखल आसात.
आम आदमी पार्टी : १६ मंत्र्यां मदले ११ (६९%) आरोपी आसात, जाल्यार ५ (३१%) मंत्र्यांचेर गंभीर आरोप आसात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
