भांगरभूंय | प्रतिनिधी
प्रधानमंत्री अर्थीक सल्लागार समितीचो अहवाल
नवी दिल्ली, खबरां संस्था ः 1950 ते 2015 मेरेनच्या 65 वर्सांत देशांतली हिंदू लोकसंख्या 7.82 टक्क्यांनी उणी जाल्या आनी मुस्लिमांची संख्या 43.15 टक्क्यांनी वाडल्या अशें प्रधानमंत्री अर्थीक सल्लागार समितीन उजवाडायल्ल्या अहवालांतल्यान स्पश्ट जालां. कौन्सिलान जारी केल्ल्या अधिकृत अहवाला प्रमाण भारतांत 1950 सावन हिंदू लोकांची लोकसंख्या व्हड प्रमाणांत उणी जाल्या. तेच बरोबर मुस्लिमांची लोकसंख्या नेटान वाडल्या. नेपाळ आनी म्यानमारांतय भोवसंख्य लोकसंख्येंत उणाव दिसून आयला. म्हत्वाचें म्हणल्यार 38 इस्लामी देशांनी मुस्लीम लोकसंख्येंत खूब वाड जाल्या.
अर्थीक सल्लागार समितीच्या अहवाला प्रमाण 1950 ते 2015 ह्या काळांत भारतांत हिंदू लोकांची लोकसंख्या उणी जाल्या. जाल्यार मुस्लीम लोकसंख्येंत वाड जाल्या. 1951 वर्साचे जनगणने प्रमाण भारतांत हिंदू लोकांचो आंकडो 84.10 टक्के आशिल्लो. पूण 2015 वर्सा हिंदूंचो आंकडो 77.52 टक्क्यांचेर पावलो. ह्या काळांत हिंदू लोकांची लोकसंख्या 7.82 टक्क्यांनी उणी जाली. त्याच वेळार 1951 वर्सा भारतांत मुस्लिमांची संख्या 9.80 टक्के आशिल्ली. 2015 वर्सा हो आंकडो वाडून 14.02 टक्के जालो. 1951-2015 ह्या काळांत मुस्लीम लोकसंख्येंत 43.15 टक्क्यांनी व्हड वाड जाल्या.
भारतांत फकत मुस्लीम न्हय तर शीख आनी क्रिस्तांव लोकांचीय लोकसंख्या वाडल्या. ह्या अहवाला प्रमाण देशांतल्या शीख लोकसंख्येंत 6.58 टक्क्यांनी वाड जाल्या जाल्यार क्रिस्तांव लोकसंख्येंत 5.38 टक्क्यांनी वाड जाल्या. पूण देशांत पारशी आनी जैन लोकांचो आंकडो मात उणो जाला.
मुस्लीम देशांनी प्रवाह वेगळो
मुस्लीम भोवसंख्य देशांनी लोकसंख्येंत बदल जावपाचो प्रवाह मात्सो वेगळो आसा. उजवाडाक आयिल्ल्या अहवाला प्रमाण मुस्लीम भोवसंख्य आशिल्ल्या 38 देशांनी मुस्लिमांचो वाटो वाडला. 1950 वर्सा पाकिस्तानांत मुस्लिमांची संख्या 77.45 टक्के आशिल्ली. आतां 80.36 टक्के आसा. ह्या काळांत बांगलादेशांत मुस्लिमांची संख्या 74.24 टक्क्यां वयल्यान 88.02 टक्के वाडली. अफगाणिस्तानांतली मुस्लीम लोकसंख्या 88.75 टक्क्यांवयल्यान 89.01 टक्के वाडल्या. पूण मालदीवांत मुस्लिमांचो आंकडो 99.36 टक्क्यांवयल्यान 98.36 टक्क्यांचेर देंवला.
ह्या अहवाला प्रमाण म्यानमारांतली बौद्ध लोकसंख्या 78.54 टक्क्यां वयल्यान 70.80 टक्क्यांमेरेन वाडली, श्रीलंकेंतली बौद्ध लोकसंख्या 64.28 टक्क्यां वयल्यान 67.65 टक्क्यां मेरेन वाडली आनी भूतानांतली बौद्ध लोकसंख्या 71.44 टक्क्यां वयल्यान 84.07 टक्क्यां मेरेन वाडली. पूण दुसरे वटेन नेपाळांतल्या हिंदू लोकांची लोकसंख्या 84.30 टक्क्यां वयल्यान 81.26 टक्क्यांनी उणी जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
