भांगरभूंय | प्रतिनिधी
नवी दिल्ली, खबरां संस्था: देशांतल्या स्थलांतरितांचो पॅटर्न वेगान बदलता. २०११ सावन २०२३ मजगतीं १२ वर्सांत अशा लोकांचें प्रमाण सुमार १२ टक्के देंवलें. २०११ त देशांत स्थलांतरितांचो आंकडो ४५.५७ टक्के आशिल्लो. २०२३ त तो ४०.२० कोटी उरला. स्थलांतरितांचो निर्देशांक पळयल्यार २०११ त तो ३८ टक्के आशिल्लो. २०२३ त तो २९ टक्के जालो. सध्या ७५ टक्क्यां परस चड स्थलांतर आपल्या मूळ गांवां पसून ५०० किमीच्या अंतरा पुरते मर्यादीत जाल्यात.
पंतप्रधानांच्या आर्थिक सल्लागार परिशदेन २०११ ते २०२३-२४ मजगतीं अनारक्षीत रेल्वे तिकीट, उपग्रहां वरवीं रातचे फोटो, मोबायलची रोमिंग नोंदणी, राज्यांतले गैरकृषी जमनीचो वापर, बँकेंत जमा केल्ले रकमेच्या आदाराचेर स्थलांतराचेर आदारीत अहवालांत हो अहवाल काडला. आतां महानगराच्या वाठारांतले उपनगर स्थलांतरितां खातीर रावपाचें नवें केंद्र म्हणून वळखतात.
महानगरांच्या शेजराक स्थलांतर वाडिल्ल्याचे पुरावे
गाझियाबादांत गैरकृषी जमिनीचो वापर १२ वर्सांत १८.७३ टक्के वाडला. उत्तर प्रदेशांत सरासरी वृद्धी ५.८ टक्के आसा. उपग्रहा वरवीं रातच्या फोटवांनी लायटीच्या उजेडांत गाझियाबाद आनी दिल्लीच्या पूर्व तशेंच ईशान्ये कडल्या जिल्ह्यांच्या शेजारच्या वाठारांत कांयच अंतर दिसना.
ठाण्यांतल्या मुंबय येवपी प्रवासी २०१२ त २१ टक्के आशिल्ले. २०२३ त ते २५ टक्के जाले. जमीन वापर वर्गीकरणाच्या आकडेवारी प्रमाण गैरकृषी जमनी वापराचो वाठार ३१ टक्क्यांनी वाडला. महाराष्ट्रांत तातूंत ४.४८ टक्क्यांनी वाड जाली. ठाणे जिल्ह्यांचो उपनगरीय वाठार ४५ टक्के वाडला. शारांत ३३ टक्के वाड जाल्या.
उत्तर २४ परगना आनी दक्षीण परगना जिल्ह्यांतल्यान कोलकाताक वचपी स्थलांतरितांच्या आंकड्यांत वाड जाली. हेर जिल्ह्यांत मात तें प्रमाण देंवलें. २०२१ त उत्तर २४ परगना जिल्ह्यांत फकत ८.४ टक्के भाग गैरकृषीच्या रुपांत वापरताले. मात २०२४ त शंभर टक्के भाग इमारती, रस्ते, रेल्वे रुळ हेर प्रकल्पांच्या ताब्यांत गेला.
७ व्हड कारणांक लागून स्थलांतरीतांचो आंकडो देंवलो
१. २०२२-२०२३ मजगतीं पीएम ग्रामीण रस्ते येवजणे खाला रस्त्यांची लांबाय २८३ % वाडली. २०११-१२ त ३.२६ लाख किमी परस वाडून २०२३ त१२.४८ लाख किमी जाली. यो- वच सुशेगाद जाल्ल्यान आशिकुशीचें स्थलांतर जावप थारलें.
२. प्रधानमंत्री आवास येवजन ग्रामीण खाला २०२४ सावन २०२४ मजगतीं २,६४,८७, ९१० घरांचें बांदकाम पुराय जालें.
३. डिसेंबर, २०१४ त सुरू जाल्ली दीनदयाल उपाध्याय ग्राम ज्योती येवजणेंत देशांत दरेका घरा मेरेन वीज पावल्या.
४. जलजीवन मिशनांत ऑगस्ट २०२४ मेरेन ११.८२ कोटी घरांनी नळा वरवीं उदक पावयलें. आतां मेरेन देशांतल्या ७७.९८ टक्के म्हळ्यार १५.०७ कोटी घरांनी नळा वरवीं उदक पावलें.
५. एप्रिल २०२४ मेरेनचे आकडेवारी प्रमाण देशांत ९५.१५ टक्के गांवांत इंटरनेटा सयत ३जी, ४जी मोबायल कनेक्टिव्हिटी पावली.
६. णव वर्सांनी २४.८ कोटी भारतीय गरीब रेशे वयर आयले.
७. २०२२ चे तुळेंत २०२३ त अनारक्षित द्वितीय श्रेणीचे प्रवासी १.७८ % देंवले. ह्या काळांत लोकसंख्या १४.८९ % वाडली.
बिहार सोडपी, महाराष्ट्रांत वचप्यांचो आंकडो सगल्यांत चड
मुंबय, बंगळुरू शार, हावडा, सेंट्रल दिल्ली, हैदराबाद ह्या ५ जिल्ह्यांनी सगळ्यांत चड स्थलांतरीत येतात. वलसाड, चित्तूर, प. वर्धमान, आग्रा, गुंटूर, विल्लूपुरम आनी सहरसाचे सगळ्यांत चड स्थलांतरीत आसात. उत्तर प्रदेशांतल्यान दिल्ली, गुजरातांतल्यान महाराष्ट्र, तेलंगणांतल्यान आंध्र, बिहारांतल्यान दिल्लीक चड स्थलांतरीत आशिल्ले.
पांच राज्यांचें आकर्शण देंवलें
दिल्ली लागसारा गाझियाबाद, मुंबईचें ठाणे, चेन्नय लागसारचें कांचीपुरम, कोलाकाताच्या उत्तर २४ परगणा जिल्ल्यांचो आसपाव आसा. ‘ट्राय’च्या आकडेवारी प्रमाण मे २०१२चे तुळेंत मे २०२३त युजर्सचो रोमिंग वापर ६.६७ % देंवलो. २०११त ५ राज्यां स्थलांतरितांक चड आकर्शीत करतालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
