देशांतल्या सगळ्यांत लांब पुलाचो कांय भाग कोसळून एकल्याक मरण
भांगरभूंय | प्रतिनिधी
सुपौल, खबरां संस्था: बिहारांतल्या सुपौलांतल्या बाकौर आनी मधुबनी जिल्ह्यांतल्या भेजा हांचे मजगतीं बांदपी पुलाचे तीन गर्डर शुक्रारा सकाळीं कोसळ्ळे. ह्या अपघातांत एका मजूराक मरण आयलां. धा परस चड मजुरांक भायर काडून हॉस्पिटलांत धाडल्यात. अशें थळावे लोक सांगतात. ४ अजूनय कोसळिल्ले रांशी पोंदाक शिरकून उरल्यात.
ह्या पुलाचो कांय भाग कोसी न्हंयेंत पडला अशें म्हण्टात. मात जंय गर्डर पडले थंय उदक नाशिल्लें. पुलाचो दर्जो सामको बाबत आसा अशें थंयच्या मुखेल वेवस्थापकाक आदीं सांगिल्लें. आमी ताचो निशेध करताले, पूण पुलीस आमकां धमकायताले, अशें पंचायत मुखेलीच्या घोवान सांगलें.
देशांतलो लांब पूल
केंद्रीय येरादारी आनी म्हामार्ग मंत्रालयान १२०० कोटी रुपया खर्च करून बांदिल्लो हो देशांतलो सगळ्यांत लांब पूल. बांदपाचें काम सुरू आसा. ताची लांबाय १०.२ किलोमीटरां परस चड आसा. ऍप्रोच रोडा सयत पुलाची वट्ट लांबाय १३.३ किमी आसतली. २०२३ मेरेन पुलाचें बांदकाम पुराय जावपाचें आशिल्लें. मात कोरोना आनी हुंवाराक लागून पुल बांदपाचो वेळ वाडयल्लो. आयज सकाळीं ह्या पुलाचे तीन गर्डर कोसळ्ळे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
