भांगरभूंय | प्रतिनिधी
नवी दिल्लीः केंद्रीय उदका आयोगान (सीडब्ल्यूसी) खुबश्या राज्यांनी व्हड हुंवार येवपाची शिटकावणी दिल्या. वेगवेगळ्या राज्यांनी 22 न्हंयो गंभीर स्थितींत आनी 23 न्हंयो सामान्य पातळे परस चड व्हांवतात अशें सांगलां. हातूंत आसाम, जम्मू-काश्मीर, ओडिसा, आंध्र प्रदेश आनी अस्तंत बंगालांतल्या केंद्रांचो आस्पाव आसा.
फुडल्या 24 वरांत गुजरात, अस्तंत मध्य प्रदेश, उदेंत राजस्थान आनी महाराष्ट्रांतल्या कांय वाठारांनी हुंवार येवपाची शक्यताय आसा. तशेंच अचकीत उदकाची पातळी वाडल्यार अधिकाऱ्यांक सादूर रावपाचो उलो आयोगान केलां.
बिहार, उत्तर प्रदेशांतल्या दरेकीं आठ आनी गुजरात, दिल्ली, झारखंड, ओडिसा, राजस्थान, अस्तंत बंगालांतल्या दरेकीं एक न्हंयांची स्थिती गंभीर आसा. तशेंच कर्नाटकांतली 12, तेलंगणांतली स, आंध्र प्रदेश पांच आनी मध्य प्रदेश, गुजरात, तमिळनाडू, ओडिसा, महाराष्ट्र आनी उत्तराखंड सयत 46 धरणां आनी बंदाऱ्या खातीर उदकाच्या प्रवाहाचो अदमास जारी केलां.
महाराष्ट्रांत उटंगार
महाराष्ट्रांतल्या धुळे, नंदूरबार, पालघर, ठाणे आनी पुणे वाठारांत उटंगार पावस पडपाची शक्यताय आसा. ताका लागून तापी, वैतरणा, भीमा, कोयना सारकिल्ल्यो न्हंयांक व्हड हुंवार येवपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
