भांगरभूंय | प्रतिनिधी
नवी दिल्ली, खबरां संस्थाः इंडियन काउन्सिल ऑफ मेडिकल रिसर्च (आयसीएमआर) खाला मुंबयच्या नॅशनल इन्स्टिट्यूट ऑफ इम्युनोहेमॅटोलॉजीद (एनआयआयएच) देशांत पयलेच खेपे दुर्मीळ आनी असामान्य रक्तगट आशिल्ल्या रक्तदात्यांची नोंदणी करपाचो निर्णय घेतला. थॅलेसीमिया आनी सिकल सेल सारकिल्ल्या दुयेंसांक रगत घालपाची गरज आसतली तेन्ना ही नोंदणी म्हत्वाची थारतली.
आयसीएमआर ही संस्था एनआयआयएचच्या आदारान भलायकी सेवा महासंचालका कडेन चर्चा करतली, जाका लागून ही नोंदणी रगत पुरवण संबंदीत म्हायती दिवपी ई-रगत बँके कडेन जोडूंक मेळटली अशी म्हायती नागपूरच्या आयसीएमआर- सेंटर फॉर रिसर्च मॅनेजमेंट अँड कंट्रोल ऑफ हिमोग्लोबिनोपॅथीजची संचालक डॉ. मनीषा मडकयकार हांणी दिली. ह्या एकवटाक लागून दुर्मीळ रक्तगट आशिल्ल्या लोकांक रगताचे बँकेचो सोद घेवप आनी रगत मेळोवप सोपें जातलें. हाका लागून रगत बँकांक केंद्रीकृत प्रणाली वरवीं सांठो आनी रक्तदात्यांचे वेवस्थापन करपाक मजत जातली.
सेंट्रल ड्रग स्टँडर्ड कंट्रोल ऑर्गनायझेशना प्रमाण (सीडीएससीओ), १४२ कोटीं परस चड लोकसंख्या आशिल्ल्या भारतांत ४,००० परस चड परवाने आशिल्ल्यो रगताच्यो बँको आसात. डॉ. मडकयकार हांणी सांगलें, भारतांतल्यान चडश्या रगताच्या बँकांनी, तांबडी रक्तपेशी घटक जारी करपा खातीर क्रॉस-मॅचिंग करचे पयलीं फकत एबीओ आनी आरएचडी अँटीजेन्स जुळयतात. तशेंच, इंटरनॅशनल सोसायटी ऑफ ब्लड ट्रान्सफ्यूजनान ४७ रक्तगट प्रणालींत ३६० परस चड अँटीजेन्स वळखल्यात. रगताच्यो बँको नेमान ह्या किरकोळ रक्तगट अँटीजेन्सची चाचणी करिनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
