भांगरभूंय | प्रतिनिधी
नागपूर, खबरां संस्था : देशांतलो ५६ वो व्याघ्र प्रकल्प म्हूण छत्तीसगडच्या गुरु घासीदास- तमोर पिंगळा व्याघ्र प्रकल्पा खातीरची अधिसुचवणी प्रसिद्ध केल्या. आंध्रप्रदेशांतल्या नागार्जुनसागर श्रीशैलम व्याघ्रप्रकल्प आनी आसामांतल्या मानस व्याघ्र प्रकल्पा उपरांत हो देशांतलो तिसरो व्हड व्याघ्र प्रकल्प थारतलो.
तो २ हजार ८२९ चौरस किलोमिटरांत पातळ्ळा. राष्ट्रीय व्याघ्र संवर्धन प्राधिकरणाच्या सल्ल्या प्रमाण, छत्तीसगड सरकारान मनेंद्रगड-चिरमिरी-भरतपूर, सूरजपूर आनी बलरामपूर जिल्ह्यांत तो आसा. ताचो २ हजार ४९ किलोमिटराचा वाठार गाभो मळाचो आसा. हातूंत गुरू घासीदास राष्ट्रीय उद्यान आनी तमोर पिंगळा रानजीव अभयारण्याचो आसपाव आसा. ७८०.१५ चौरस किलोमिटर बफर वाठार आसा. नवो अधिसूचित व्याघ्र प्रकल्प मध्यप्रदेशांतल्या संजय डुबरी व्याघ्र प्रकल्पा कडेन आशिल्ल्यान थंय सुमार चार हजार ५०० चौरस किलोमिटरचे ‘लँडस्केप कॉम्प्लेक्स’ तयार करतात. व्याघ्र प्रकल्प पश्चीमेक मध्य प्रदेशांतल्या बांधवगड व्याघ्र प्रकल्पा कडेन आनी पूर्वेक झारखंडांतल्या पलामाऊ व्याघ्र प्रकल्पा कडेन जोडिल्लो आसा.
राष्ट्रीय व्याघ्र संवर्धन प्राधिकरणान ऑक्टोबर २०२१ त गुरू घासीदास तमोर पिंगळा व्याघ्रप्रकल्पाक अधिसुचीत करपाक निमाणी मान्यताय दिल्ली. छोटा नागपूरच्या पठाराचेर आनी कांय प्रमाणांत बघेलखंडच्या पठाराचेर वशिल्ल्या व्याघ्र प्रकल्पांत दाट रानां, व्हाळ आनी न्हंयो आसात. जो समृद्ध रान विविधतायेक आसरो दिवपाक अनुकूल आसा आनी तातूंत वागां खातीर अधिवास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
