भांगरभूंय | प्रतिनिधी
भांगरभूंय । प्रतिनिधी
दिवचलः पंतप्रधान नरेंद्र मोदी हाणी फाटल्या धा वर्सांत भारताक विश्व गुरू करपाचे दिकेन वाटचाल करपा खातीर नवी प्रेरणा दिल्या. देशाची तरणाटी पिळगी पुरायपणान तांच्या वांगडा आसा असो दावो मुख्यमंत्री डॉ प्रमोद सावंत हाणे केलां. विकसीत भारताचें सपन प्रत्यक्षांत हाडपा खातीर तरणाट्यांनी नव्यो कल्पना सुचोवच्यो आनी देशाक बळीश्ट करपाक योगदान दिवचें अशें आवाहन ताणे साखळे केलें.
पंतप्रधान नरेंद्र मोदी हाणी देश आनी राज्य पांवड्यार केल्ल्या वावराची दखल घेवंन तांकां परबीं भेटोवपा खातीर युवा शक्तीची खाशेली रॅली साखळी मतदारसंघांत काडल्ली त्या वेळार मुख्यमंत्री उलयताले. देशांत मुळाव्यो सुविधा, उदरगत आनी हेर माध्यमांतल्यान व्हडलें येश मेळोवन दितना मोदी हाणी युवा शक्तीची भूमिका आनी फुडाराची दृश्टींक म्हत्व दिलां. क्लीन इंडिया तें फीट इंडिया तशेंच वेगवेगळ्या माध्यमांतल्यान विकसीत भारता खातीर मोदी हांची संकल्पना खूब व्हड आसा. ती साकार करपा खातीर तरणाट्यांनी सगळी शक्त मोदी हांच्या फाटल्यान आसा आनी खऱ्या अर्थान भारत संवसारीक पांवड्यार विश्व गुरू जावपाचे वाटेर आसा अशें डॉ सावंत हाणे सांगलें.
फुडारांतलो भारत कसो आसचो हे विशींच्या संकल्पना तरणाट्यांनी सादर करच्यो अशें आवाहन मुख्यमंत्र्यांन रॅलींत केलें. रॅलींत भाजपाचे साखळी मंडळ अध्यक्ष गोपाळ सुर्लकार, साखळेची नगराध्यक्ष रश्मी देसाय, कालिदास गांवस, संतोष मळीक, राजन फाळकार, कृष्णा गांवस, आनंद काणेकार, पंचायतींचे सरपंच आनी विद्यार्थी वांटेकार जाल्ले. साखळेच्या सामाजीक हॉस्पिटला सावन सुरू जाल्ले हे रॅलींत पंतप्रधानाक परबीं दिवपी घोशणा दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
