भांगरभूंय | प्रतिनिधी
नवी दिल्ली, खबरां संस्था ः देशांतलें दर आठवें भुरगें (सुमार 13%) अकाली जल्मता आनी दर सवें भुरगें (सुमार 18%) जल्माक येतना कमी वजनाचें जल्माक येता. आयआयटी दिल्ली, इंटरनॅशनल इन्स्टिट्यूट फॉर पॉप्युलेशन सायन्सेस मुंबय आनी युके-आयर्लंड संस्थांनी केल्ल्या संयुक्त संशोधनांत हो दावो केलां.
उत्तर भारतांतल्या हिमाचल प्रदेश (39%) आनी उत्तराखंड (27%) ह्या राज्यांनी अकाली जल्माचें प्रमाण चड आसा. दुसरे वटेन जल्माक येतना कमी वजनाच्या भुरग्यांचें प्रमाण पंजाबांत चड (22%) आसा.
संशोधना प्रमाण, राजस्थानांत 18.29%, महाराष्ट्रांत 8.72% आनी मध्य प्रदेशांत 14.84% भुरगीं अकाली जल्माक येतात. मध्य प्रदेशांत 21% वजनाची भुरगीं जल्मतात, जाल्यार राजस्थानांत हो आंकडो 18% आसा. तशेंच उत्तर प्रदेश-बिहारांत सुमार 15% भुरगीं अकाली जल्माक येतात.
वायु प्रदुशणाक लागून कमी वजनाच्या भुरग्यांचो आंकडो वाडटा
गुरवारपणांत पीएम 2.5 (2.5 मायक्रॉना परस ल्हान कण) चे वाडटे प्रमाण हें जल्माक येतना समस्या जावपाचे एक मुखेल कारण थारता अशें संशोधनांतल्यान दिसून आयलां. दर 10 मायक्रोग्राम/क्यूबिक मीटर वाडल्यार जल्माक येतना कमी वजनाचे भुरगें जावपाची शक्यताय 5% वाडटा आनी अकाली जल्म जावपाची शक्यताय 12% वाडटा अशें ह्या अभ्यासांत दिसून आयलां. ते भायर चड उश्णताय वा अनियमीत पावस अशा पर्यावरणीय परिस्थितीचोय जल्म परिणामांचेर वायट परिणाम जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
