भांगरभूंय | प्रतिनिधी
नवी दिल्ली, खबरां संस्था ः देशांतली पयली हायड्रोजन ट्रेन जिंद-गोहाना-सोनीपत ट्रॅकाचेर चलपाक तयार आसा. जर्मनी, फ्रांस, स्वीडन आनी चीन हांचे उपरांत भारत हो तंत्रगिन्यान आपणावपी संवसारांतलो पांचवो देश जातलो. हे खातीर जिंद हांगा आधुनिक हायड्रोजन प्लांट बांदतात आनी इंजिनय तयार केला.
ही ट्रेन संवसारांतली सगळ्यांत लांब आनी बळिश्ट हायड्रोजन ट्रेन आसतली, जी 2,638 प्रवासी व्हरपाक शकता आनी वरांक 110 ते 140 किलोमीटर वेगान चलतली. हायड्रोजन फ्युल सेल तंत्रगिन्यानाचेर आदारिल्ली ही ट्रेन फकत उदक आनी वाफ सोडटली, जाका लागून प्रदुशण जावचे ना.
रेल्वे मंत्री अश्विनी वैष्णव हांणी देशांतल्या पयल्या हायड्रोजन ट्रेनीचो व्हिडियो आपल्या एक्स हँडलाचेर शेअर केलां, तातूंत ताची डिझायन आनी खाशेलपणां दाखयल्यांत.
० भारताची पयली हायड्रोजन ट्रेन रोखडीच प्रवाशां खातीर येतली आनी सध्या चेन्नयच्या एका कारखान्यांत तिची निर्मिती सुरू आसा.
० 1200 हॉर्सपॉवर क्षमतायेच्या ह्या ट्रेनचे काम चालू आसा आनी ती वरांक 110 किमी वेगान चलतली. ते खातीर वंदे भारता उपरांत मेक इन इंडियाची आनीक एक हायस्पीड ट्रेन सुरू जाता.
० देशांत हायड्रोजन इंधनाचेर चलपी ही ट्रेन जींद-सोनीपत मार्गाचेर सुरू जातली. विशेश म्हणल्यार 2023 वर्सा अश्विनी वैष्णवान राज्यसभेंत हायड्रोजन ट्रेन सुरू करपाची घोशणा केल्ली.
० हे ट्रेनीक ‘नमो ग्रीन रेल’ अशें नांव दिला. हायड्रोजन ट्रेनांत वट्ट 10 डबे आसात.
० हरियाणांतल्या जिंद ते सोनीपत मार्गाचेर ह्या ट्रेनीची चांचणी जातली. हायड्रोजन हें सगळ्यांत निवळ इंधन मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
