देशांतली पयली हायड्रोजन रेल्वे दोन म्हयन्यां भितर धांवतली

भांगरभूंय | प्रतिनिधी

नवी दिल्ली, खबरां संस्था : देशांतली पयली हायड्रोजन रेल्वे डिसेंबर- जानेवारींत सोनीपत- जिंद मजगतीं ९० किमी धांवतली. ही पयली प्रदूशण मुक्त रेल्वे. डिझेल रेल्वे ह्याच अंतरा खातीर ९६४ किलो कार्बन उत्सर्जीत करता. जिंद रेल्वे स्टेशनाचेर ३००० किलो हायड्रोजन साठोवपा खातीर प्लांट तयार करतात. रेल्वेक दर वराक ४० हजार लिटर उदक लागतलें. जिंद रेल्वे स्टेशनाचेरूय जमनी पोंदाक उदक सांठोवपाची वेवस्था तयार करतात. थळाव्यांच्या पांख्यार सांठून उरिल्लें उदक हांगा पावतलें.
रेल्वे चलोवपाची यंत्रां आयल्यांत. हायड्रोजन रेल्वेक ८ ते १० डबे आसतले. डिसेंबर- जानेवारींत तपासणी जाले उपरांत फुडल्या अर्थीक वर्सा ती नेमान सुरू जावपाची शक्यताय आसा. चेन्नयक इंटिग्रल कोच फॅक्टरींत तयार जावपी डबे डिसेंबर मेरेन तयार जातले. स्वीडन, चीन, जर्मनी आनी फ्रान्सा उपरांत हायड्रोजन रेल्वे चलोवपी भारत हो संवसारातलो पांचवो देश थारतलो. पयल्या टप्प्यांत दोन गाडयो धांवपाक शकतात. तांचो वेग वराक १४० किमी आसतलो. १ किल हायड्रोजन ४.५ लिटर डिझेलच्या बरोबरीन मायलेज दितलें.

रेल्वेंतूच वीज तयार करतले
हायड्रोजन रेल्वेंत इंधन सेल बसयतात. ते हायड्रोजन आनी ऑक्सिजनचें मिश्रण करून वीज निर्माण करतात. हे विजेचो उपेग रेल्वेच्या मोटर्स आनी टायर चलोवपा खातीर करतात. रेल्वेंतल्यान धुंवरा बदला उदक सोडटले.

३६० किलो हायड्रोजनाचेर रेल्वे १८० किमी धांवतली

हायड्रोजन रेल्वे हायड्रोजन इंधन सेला वरवीं हायड्रोजन आणि ऑक्सिजन सावन वीज तयार करतली. ही रेल्वे ३६० किलो हायड्रोजनवर १८० किमीचो प्रवास करतली. रेल्वेचे १० डबे ओडपाक २.४ मेगावॅट वीज लातली. रेल्वेंत दोन पॉवर प्लँट आसतले. तपासणी येसस्वी जाले उपरांत माथेरान हिल रेल्वे (महाराष्ट्र), दार्जिलिंग हिमालयन रेल्वे, कालका-सिमला रेल्वे, कांगडा व्हॅली, निलगिरी माउंटन रेल्वे हेरिटेज आनी मावंटन मार्गांचेर ३ वर्सांनी ३० हायड्रोजन रेल्वे सुरू करपाची रेल्वेची येवजण आसा.

पायपा वरवीं भरतले रेल्वेंत
जिंद रेल्वे स्टेशनाचेर उदका पसून ऑक्सिजन-हायड्रोजन निर्मिती जातली. तातूंतल्यान हायड्रोजन इंधन तयार करतले. तें हायड्रोजन डेपोच्या टाकयांनी सांठयतले. हांगच्यान हायड्रोजन गॅस पायपलायनी वरवीं ट्रेनींत भरतले.