भांगरभूंय | प्रतिनिधी
900 चो घरगुती सिलिंडर 1800 रुपयांक
वेवसायीक सिलिंडरा खातीर 4 हजार रुपया
खबरां संस्था
नवी दिल्ली : अमेरिका- इझ्रायलाच्या इराणा वांगडा चलिल्ल्या झुजाक लागून देशभरांत एलपीजीचो उणाव वाडला. गॅस सिलिंडर एजन्सी भायर लांबचे लांब रांको लागल्यात. ते भायर गॅस सिलिंडरांचो काळोबाजार सुरू जाला.
बिहारांत घरगुती गॅस सिलिंडर 1800 रुपयांक विकतात, जाल्यार मध्य प्रदेशांत वेवसायीक सिलिंडर काळ्या बाजारांत 4 हजार रुपयांक विकतात. इतलेंच न्हय जाल्यार वेवसायीक गॅस सिलिंडराचे पुरवणेचेर बंदी आयिल्ल्यान हॉटेलां आनी रेस्टॉरंण्टांनी इंडक्शनाचेर रांदपाक सुरवात जाल्या.
भोपाळांत 1918 रुपयांचो वेवसायीक सिलिंडर काळ्या बाजारांत 4 हजार रुपयांक विकतात. सरकारान काळो बाजार आडावपा खातीर गरजेच्यो वस्तू अधिनेम लागू केला, पूण काळो बाजार करप्यांचेर ताचो परिणाम जावंक ना.
बिहारांत लेगीत 918 रुपयांक मेळपी एलपीजी सिलिंडर काळ्या बाजारांत 1700 ते 1800 रुपयांक लोक घेतात. जाल्या 1910 रुपयांक मेळटालो तो वेवसायीक गॅस सिलिंडर 5 हजार रुपयांक विकतात. लखनौंत लेगीत 950 रुपयांचो एलपीजी 1600 रुपयांक जाल्यार वेवसायीक गॅस सिलिंडर 3500 रुपयांक सहज मेळटा.
पंजाबांत लोक एजन्सी मुखार सिलिंडर घेवन रांकेंत आशिल्ल्याचें चित्र दिसतालें. वेवसायीक सिलिंडर मेळप बंद जालां आनी घरगुती सिलिंडराचें बुकींग करपाक लेगीत समस्या येतात. जालंधरांत लोक काळ्या बाजारांतल्यान 3500 रुपयांक सिलिंडर घेतात. अशें आसलें तरीय सगल्या जिल्ह्यांचे प्रशासकीय अधिकारी सांगतात, एलपीजीचीच समस्या ना, तांचे कडेन गॅसाचो फावोसो सांठो आसा.
देहरादून आनी हल्द्वानींत वेवसायीक गॅस सिंलिंडराची पुरवण बाधीत जाल्ल्यान हॉटेल, रेस्टॉरंण्ट, ढाबा आनी ठेला चालकां मुखार व्हड संकश्ट उबें जालां. सिलिंडराच्या उणावाक लागून खूबश्या आस्थापनांनी तांच्या मेनूंतल्यान सुमार 70 टक्के खाद्यपदार्थ काडून उडयल्यात. हिसार, सोनीपत, फतेहाबाद, हाँसी, पानिपत, कैथल, रेवाडी आनी फरिदाबादां गॅस एजन्सी भायर लोकांच्यो लांबचे लांब रांको लागिल्ल्यो दिसतालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
