देशभरांत फुडल्या 24 वरांत उटंगाराचो पावस
भांगरभूंय | प्रतिनिधी
नवी दिल्ली : हवामान खात्यान फुडल्या 24 वरांत बिहार आनी तेलंगणा सोडल्यार गोंयां सयत देशांतल्या हेर सगळ्या राज्यांनी मोठो पावस पडटलो अशी शिटकावणी दिल्या.
जम्मू- काश्मीरांत व्हड पावस आनी वायट हवामानाक लागून अमरनाथ यात्रा फुडें धुकल्ल्या.
उत्तराखंडांतल्या चामोली हांगा फातर पडिल्ल्यान बद्रीनाथ म्हामार्गूय बंद आसा. फाटल्या धा दिसांनी चवथे खेपे हो म्हामार्ग बंद जाला.
आडपयच्या विठोबा नायक हांच्या घराचेर पडिल्लें झाड.
पुराय गोंयांत गांवांगांवांनी झाडां पडल्यांत, कांय सुवातांचेर झाडां वाहनांचेर, घरांचेर कोसळून बरेंच लुकसाण जालां. तशेंच पालसणी कोसळून रस्ते बंद जाल्ल्यान लोकांक बरेच त्रास सोंसचे पडल्यात.
उत्तराखंडांत धारचुलांत शुक्रारा ढगफुटींत पूल व्हांवून गेल्ल्यान 200 लोक गांवांत आडखळून उरल्यात. तशेंच तांकां वाटावपा खातीर वचपी एसडीआरएफची टिमूय आडखळ्ळ्या. जाल्यार उत्तर प्रदेशांत बिरेस्तारा वीज पडून 13 जाणांक मरण आयलां.
धारचुलांत शुक्रारा ढगफुटींत पूल गेलो व्हांवून.
केरळांतल्या खुबश्या जिल्ह्यांनी सेगीत पावस झडतूच आसा. कन्नूर, कासारगोडाक रेड अलर्ट जारी केला.
भारतांत फुडलीं 24 वरां
मध्य प्रदेश, राजस्थान, हिमाचल प्रदेश, उत्तराखंड, उत्तर प्रदेश, गुजरात, दिल्ली, पंजाब, हरियाणा, सिक्कीम, पश्चीम बंगाल, आसाम, त्रिपुरा, मेघालय, मिझोराम, मणिपूर, अरुणाचल प्रदेश, नागालँड, ओडिशा, छत्तीसगड, झारखंड, महाराष्ट्र, गोंय, आंध्र प्रदेश, कर्नाटक, केरळ आनी तामिळनाडू हांगा उटंगराचो पावस पडटलो.
तशेंच बिहार, तेलंगण आनी जम्मू आनी काश्मीरांत गडगड मारून उणो पावस पडपाची शक्यताय आसा. आंध्र प्रदेशांतल्या रायलसीमा, महाराष्ट्रांतल्या मराठवाड आनी पश्चिम बंगालांत हवामान नितळ आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
