भांगरभूंय | प्रतिनिधी
-टाटा इन्स्टिट्यूट ऑफ सोशल सायन्सांतल्या अहवालांतली म्हायती
मुंबयः देशभरांतल्या प्राथमीक शिक्षकां मदीं 50 टक्क्या परस चड शिक्षक हे शिक्षणशास्त्र पदवीका, पदवी अशें किमान पात्रताय निकश पुराय करपी नात, जाल्यार भोवसंख्य शिक्षक गणीत, विज्ञान आनी इंग्लीश अध्यापना खातीर त्या विशयांतले पदवीधर शिक्षक नाशिल्ल्याचे टाटा इन्स्टिट्यूट ऑफ सोशल सायन्सान केल्ल्या अभ्यासांतल्या उक्तें जालां.
असरच्या अहवालांतल्यान हालींच विद्यार्थ्यांच्या शिक्षणीक अधोगतीचे दाखले मेळ्ळे उपरांत आतां देशभरांतल्या शाळांतल्या शिक्षकांची शिक्षणीक पात्रताय बरी नाशिल्ल्याचे टाटा इन्स्टिट्यूट ऑफ सोशल सासन्सेसच्या सेंटर फॉर एक्सलन्स इन टिचर्स एज्युकेशनान केल्ल्या अभ्यासाच्या निश्कर्शांतल्यान दिसून येता. देशभरांतल्या प्राथमीक शिक्षकां मदीं फक्त 46 टक्के शिक्षक हे शिक्षणशास्त्रांतले पदवीधारक (डीएड), वा पदवीधारक (बीएड) आसात. खाजगी शाळांनी अपात्रताय शिक्षकांची संख्या तुळेंत चड आसा. पदवीचें शिक्षण ज्या विशयांत घेतलां त्याच विशयाचे अध्यापन करपाची संद 68 ते 70 टक्के शिक्षकांक मेळ्ळ्या, तरी लेगीत गणीत, विज्ञान, इंग्लीश विशय शिकोवपा खातीर शिक्षकांचो उणाव आसा. ते खातीर इंग्लीश विशय शिकोवपा खातीर पदवीचे शिक्षण ह्या विशयांतले गिन्यान नाशिल्ल्या शिक्षकांची नेमणूक केल्या. हे विशय शिकोवपी शिक्षकां मदीं 35 ते 40 टक्के शिक्षकांची पदवी गणीत, विज्ञान वा इंग्लीश विशयांतली ना.
ह्या अहवालाचे प्रकाशन बिरेस्तारा केंद्रीय शिक्षण सचीव संजय कुमार हांचे हस्तुकीं, टाटा ट्रस्टाचे मुख्य कार्यकारी अधिकारी सिद्धार्थ शर्मा, टाटा इन्स्टिट्यूट आॅफ सोशल सायन्सेस, सेंटर फॉर एक्सलन्स इन टिचर्स एज्युकेशनाचे अध्यक्ष पद्मा शारंगपाणी हांचे हाजिरेंत जालें.
——————————-
खाजगी शाळांचे वर्चस्व, पूण शिक्षकांची छळणूक
वट्ट शिक्षकां मदीं खाजगी शिक्षण संस्थांत 40 टक्क्या परस चड शिक्षक हे खाजगी शिक्षण संस्थांनी कार्यरत आसात. थंय तांकां मुळाव्यो सुविधा बऱ्यो मेळटात. पूण खाजगी संस्थांतल्या शिक्षकांक अल्प वेतनाचेर काम करचे पडटा. पन्नास टक्क्या परस चड शिक्षकांक कसलीच हमी, कायदेशीर कंत्राटा खेरीत काम करचे पडटा.
शारिरीक शिक्षण, कला विशया कडेन आडनदर
खाजगी शाळांचे तुळेंत शारिरीक शिक्षण, कला, संगीत ह्या विशयां कडेन आडनदर जाता. शारिरीक शिक्षणा खातीर 36 टक्के सरकारी शाळांनी जाल्यार 65 टक्के खाजगी शाळांनी शिक्षक आसात. कला विशया कडेन जाल्यार आडनदर जाता. 20 टक्के सरकारी जाल्यार 57 टक्के खाजगी शाळांनी शिक्षक आसात. संगिता खातीर 12 टक्के सरकारी जाल्यार 39 टक्के खाजगी शाळांनी शिक्षक अाशिल्ल्याचे अहवालांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
