भांगरभूंय | प्रतिनिधी
नामनेचे अभिनेते, दिग्दर्शक मनोजकुमार काल संवसाराक अंतरले. ते निमतान विशेश….
भारत कुमार ह्या नांवान लोकप्रीय आशिल्लो बॉलिवूडाचो अभिनेतो- दिग्दर्शक मनोज कुमार काल पिरायेच्या 87 व्या वर्सा भायर पडलो. देशभक्तीच्या चित्रपटांक लागून ताची नामना आशिल्ली. ‘मेरे देश की धरती…’ आनी ‘भारत की बात सुनाता हूं’ सारकीं देशभक्तीच्या गितां वरवीं त्या काळांतले भुरगे लेगीत मनोज कुमाराक वळखताले. भारतीय सिनेमाच्या मळार ताणें दिल्ल्या योगदाना खातीर भारत सरकारान 1992 वर्सा पद्मश्री आनी 2015 वर्सा सिनेमा मळा वयलो सगल्यांत व्हडलो दादासाहेब फाळके पुरस्कार दिवन ताचो भोवमान केल्लो.
मनोज कुमार बहुआयामी कलाकार. चित्रपट निर्मिती प्रतिभेंतल्यान, लेखन, संपादन, अभिनय आनी देशभक्तीच्या चित्रपटांतल्या खाशेल्या भुमिकां वरवीं तो प्रेक्षकांच्या काळजांत जिवो उरतलो. आदले प्रधानमंत्री लालबहादुर शास्त्री हांचे सुचवणे वयल्यान ताणें ‘उपकार’ हो सिनेमा काडिल्लो, अशें म्हण्टात. तो हिट जालो. आयज मेरेन लोक तातूंतलीं गितां आयकतात. सिनेमाच्या माध्यमांतल्यान लोकां भितर देशभक्तीची भावना ताणें जागयिल्ली. मनोज कुमाराचेर ‘शहीद-ए-आजम’ भगत सिंग हांचो खुब प्रभाव आशिल्लो. तेच भावनेतल्यान ताणें ‘शहीद’ सारक्या चित्रपटांत भगत सिंगाचें पात्र जिवें केलें.
मनोज कुमाराचो जल्म 24 जुलय 1937 दिसा पाकिस्तानांतल्या अबोटाबाद शारांत जाल्लो. ताचें मूळ नांव हरिकिशन गिरी गोस्वामी. देशाची फाळणी जातकच ताचें कुटूंब राजस्थानांतल्या हनुमानगढ जिल्ह्यांत स्थायीक जालें. मनोज कुमारान तागेल्या फिल्मी कारकिर्दीत शहीद, उपकार, पूरब और पश्चिम और क्रांती सारकी देशभक्तीचेर आधारित
जायत्या खाशेल्या चित्रपटांनी काम केलें. ह्या कारणाक लागून ताका ‘भारत कुमार’ अशेंय म्हण्टात. 1960- 70 च्या दशकांत कारकिर्दीच्या येसाचे तेंगशेंर पावपी मनोज कुमार हो फकत एक प्रभावी अभिनेतोच न्हय, तर देशभक्त म्हूणय तो एक आदर्श थारिल्लो.
शहीद सिनेमाचे दोन वर्सां उपरांत ताणें दिग्दर्शक म्हणून आपलो पयलो चित्रपट ‘उपकार’ तयार केलो. तातूंत भरत नांवाच्या शेतकार तरणाट्याची भुमिका केल्ली, जो परिस्थितीक लागून गांव सोडून झुजा मळा वयलो सैनिक जाता. तेन्नाचे प्रधानमंत्री लालबहादुर शास्त्री हांणी दिल्या ‘जय जवान जय किसान’ घोशणेच्या आदाराचेर तो सिनेमा तयार केल्लो. तातूंत गांवचो मनीस शारांत पळून वचून मागीर परत येवपाचो आनी ताचे कडेन संबंदीत समाजीक संबंदांची काणी आशिल्ली. तातूंत त्या काळांतली परिस्थिती दाखयिल्ली. ‘उपकार’ सिनेमाक बेस्ट फिल्म, डायरेक्टर, स्टोरी आनी डायलॉग ह्या विभागांत फिल्मफेयर पुरस्कार फावो जाले. दुसरो उत्कृश्ट फिचर फिल्माचो राष्ट्रीय पुरस्कार आनी उत्कृश्ट संवादाक बीएफजेए पुरस्कार फावो जालो. ‘शहीद’ सिनेमाकूय कथे खातीर राष्ट्रीय पुरस्कार फावो जाल्लो. तातूंत सरदार भगत सिंगाची कथा आशिल्ली.
मनोज कुमाराचेर दिलीप कुमाराचो बरोच प्रभाव आशिल्लो. ताणें शबनम सिनेमांतल्या दिलीपाच्या पात्राक ‘मनोज’ हें नांव दिल्लें. 1957 वर्सा फॅशन ह्या चित्रपटांतल्यान मनोज कुमार व्हडल्या पडद्याचेर प्रवेश केल्लो. मुखेल भुमिकेंतलो ताचो पयलो चित्रपट म्हणल्यार 1960 वर्सांतलो ‘कांच की गुडिया.’ ते उपरांत ताचे आनीक दोन चित्रपट पिया मिलन की आस आनी रेशमी रुमाल आयले, पूण पयलो हिट थारलो हरियाली और रास्ता (1962).
मनोज कुमारान वो कौन थी, हिमालय की गोद में, गुमनाम, दो बदन, पत्थर के सनम, यादगार, शोर, संन्यासी, दस नम्बरी आनी क्लर्क सारकिल्ल्या फिल्मांनी काम केल्लें. ताचो निमाणो चित्रपट मैदान- ए- जंग (1995). मनोज कुमारान आपल्या देशभक्तीच्या चित्रपटां वरवीं तरणाट्यां बरो संदेश दिलो. ताणें जायते चित्रपट तयार करून फायद्या परस देशभक्ती खातीर नामना जोडली.
मनोज कुमाराची एक हात तोंडार दवरुन संवाद म्हणपाची शैली गाजिल्ली. ताका 1972 वर्सा ‘बेईमान’ खातीर उत्कृश्ट अभिनेत्याचो फिल्मफेयर पुरस्कार आनी 1975 वर्सा ‘रोटी कपडा और मकान’ खातीर उत्कृश्ट दिग्दर्शक म्हूण पुरस्कार फावो जाल्लो. 1999 वर्सा ताका जिणेगौरव फिल्मफेयर पुरस्कार फावो जाल्लो. मनोज कुमार जरी संवसाराक अंतरलो तरी देशभक्तीच्या चित्रपटांतल्यान आनी तागेल्या अभिनयान तो रसिकांच्या मनांत तो कायम उरतलो.
—————————–
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
