भांगरभूंय | प्रतिनिधी
हजारांनी भाविकांची हजेरी; 11 दीस चलतली जात्रा
म्हापशें: काल (बुधवारा) हजारांनी भाविकांचे हाजिरेंत नामनेचें आनी जागृत दैवत श्रीदेव बोडगेश्वराचे 89 वे जात्रेक सुरवात जाली. फुडले 11 दीस हो जात्रोत्सव चलतलो.
जात्रेच्या पुजेचें येजमानपद देवस्थान समितीचे मुखत्यार राजेंद्र पेडणेंकार हांणी आपले घरकान्नी सयत भुशयलें. दनपारां 12 वरांचेर देवाच्या चरणांत श्रीफळ दवरून आनी पुरयतान गाराणें घाले उपरांत जात्रेक सुरवात जाली.
ह्या वेळार म्हापशें वाठारांलीं विवीध देवस्थानां, विवीध संस्था, पुलीस, उजो पालोवपी दळ आनी पालिके वतीन श्रींच्या चरणांत फळांचो प्रसाद अर्पण केलो. विवीध मानेस्तां सयत भलायकी मंत्री विश्वजित राणे, राज्यसभा खासदार सदानंद शेट तानावडे, आमदार मायकल लोबो, आमदार दिगंबर कामत, आमदार दिव्या राणे हांणी श्रींचे दर्शन घेतलें. मंगळारा वर्धापन दिसा निमतान उपसभापती ज्योशुआ डिसोझा, केंद्रीय मंत्री श्रीपाद नायक, नगराध्यक्षा प्रिया मिशाळ, उपनगराध्यक्ष विराज फडके आनी सद्याच्या आनी आदल्या नगरसेवकांनी श्रींचें दर्शन घेतलें.
मंगळारा श्रीदेव बोडगेश्वराचे मुर्ती प्रतिश्ठापनेचो 34 वो वर्धापन दीस मनयलाे. दनपारां महाप्रसाद जाल्यार सांजवेळा सवायशिणीं वतीन दीपोत्सवाची कार्यावळ जाली. तशेंच वेशभुशा सर्त जाली.
बुधवारा दनपारां मुख्य पुजा जाले उपरांत भाविकांनी देवदर्शन घेवपाक सुरवात केली. ह्या वेळार महाप्रसाद जालो. सांजवेळा 4 वरांचेर नवदुर्गा दिंडी पंगड बोरी वतीन दिंडीची कार्यावळ जाली. जाल्यार 6 वरांचेर नवदुर्गा भजनी मंडळ बोरी ह्या पंगडाची भजनाची कार्यावळ जाली. रातच्या 12 वरांचेर कालचक्र हो दशावतारी नाट्यप्रयोग प्रवीण कळंगूटकार पंगडान सादर केलो.
बिरेस्तार 25 ते आयतार 30 जानेवारी मजगतीं सकाळीं 10 वरांचेर देवस्थानांत विवीध संस्था आनी संघटणा वतीन श्रीसत्यनारापण महापुजा आनी महाप्रसाद जातलो.
जाल्यार सांजवेळा चांदणे स्वरांचे, नक्षत्रांचे देणे, स्वर अक्षर, मोहक, स्वारांचे सार्थक. मुद्रा, दिंडी, डान्स वाईब्स, स्वर अभिषेकी अशेें गायन, नृत्य, दिंडी आनी सांस्कृतीक कार्यावळी सादर जातल्यो.
बुधवार 31 जानेवारी दिसा सांजवेळा 5.30 वरांचेर स्वरांजली आनी किशोरी मुर्के (पुणें) आनी गणेश मेस्त्री (मुंबय) हांची सुगम संगिताची कार्यावळ जातली.
बिरेस्तार 1 फेब्रुवारी दिसा सांजवेळा 5.30 वरांचेर नृत्यमार्ग हा स्वेता (मोरजी) आनी वांगड्यांची कार्यावळ जातली. उपरांत 7.30 वरांचेर विनय महोले आनी वेदा नेरुरकर (मुंबय) हांची ‘सूर ईश्वर हो’ ही सुगम संगिताची कार्यावळ जातली.
शुक्रार 2 फेब्रुवारी दिसा सांजवेळा 6 वरांचेर गोंय बाल भवना वतीनरंगारंग ही कार्यावळ जातली. शेनवार 3 वेर सांजवेळा 6 वरांचेर कला आनी संस्कृती संचालनालया वतीन सांस्कृतीक कार्यावळ 7.30 वरांचेर वैष्णवी जोशी आनी वांगड्यांची सांस्कृतीक नृत्याची कार्यावळ जातली.
आयतार 4 फेब्रुवारी दिसा सांजवेळा 6 वरांचेर स्वर चैतन्याचे ही सुभाष पवार आनी नम्रता जोशी हांची सुगम संगिताची कार्यावळ जातली. रातच्या 8 वरांचेर मंदिरा तिरोडकार जोशी आनी वांगड्यांची भरतनाट्यम कार्यावळ जावन ह्या जात्रोत्सवाचो समारोप जातलो.
जात्रोत्सवा निमतान बुधवारा हजारांनी भाविकांनी श्रींचें दर्शन घेतलें. देवस्थाना भायर सकाळ सावन भाविकांची गर्दी दिसून येताली. ह्या वेळार राजकी पक्षांचे फुडारी, लोकप्रतिनिधी, सरकारी अधिकारी आनी समाजीक कार्यकर्त्यांनी देवळांत वचून देवाचें दर्शन घेतलें. अंदूं जात्रेचे फेरयेक 600 ते 650 दुकानां आयल्यांत. तशेंच जायंट व्हील सारके मनरिजवणेचे खेळ जात्रेक लोकांचें आकर्शण थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
