भांगरभूंय | प्रतिनिधी
मंत्रिमंडळ फेरबदल आनी दिल्ली भेटी विशीं मुख्यमंत्र्यांची प्रतिक्रीया
पणजी : आमदारांचे हाजेरींत मुख्यमंत्री डॉ. प्रमोद सावंत हांच्या दिल्ली भेटीक लागून राज्यांत मंत्रिमंडळ फेरबदल चर्चा चालू आसा. मात ताचेर उलोवपाक न्हयकारतना ‘देव बरें करूं’ इतलीच प्रतिक्रीया मुख्यमंत्री डॉ. प्रमोद सावंत हांणी उक्तायली. ह्या वेळार तांचे वांगडा पेडणेंचे आमदार प्रवीण आर्लेकार हजर आशिल्ले.
राज्यांत बरेच दीस जाले मंत्रिमंडळ फेरबदलाची चर्चा सुरू आसा. गोंय मुक्ती दिसा उपरांत मुख्यमंत्री डॉ. सावंत हांणी राजस्थानांत अर्थसंकल्प बसकेक हाजेरी लावन दिल्लीक भेट दिली. ह्या वेळार तांचे वांगडा मगोचे आमदार जीत आरोलकार, आमदार प्रेमेंद शेट आनी आमदार कृष्णा साळकार हजर आशिल्ले. ह्या तीन आमदारां सयत तांणी दिल्लीक केंद्रीय मंत्री तशेंच फुडार्यांक भेट दिली. आमदार प्रविण आर्लेकार हेय दिल्लीक गेल्ले. आमदारां सयत दिल्लींत मुख्यमंत्र्यांनी केंद्रीय फुडार्यांची भेट घेवपाचो हो पयलोच प्रसंग आशिल्लो. हाका लागून राज्यांत नेतृत्वबदलाचीय चर्चा सुरू जाली.
नातालां निमतान मंत्रालयांत शांतताय आसतना आमदार आर्लेकार हांणी मुख्यमंत्री सावंत हांची भेट घेतली. उपरांत पत्रकारांनी दिल्ली भेटी विशीं विचारलें तेन्ना ते विशीं म्हायती दिवपाक मुख्यमंत्र्यांनी न्हयकार दिलो. ‘देव बरें करूं..’ इतलीच प्रतिक्रिया तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
