भांगरभूंय | प्रतिनिधी
पेडणें: कॉंग्रेस पक्षाक फुडार आसा. जायते कार्यकर्ते, समर्थक कॉंग्रेसी कडेन आशेन पळयतात. जे आदले कार्यकर्ते पक्षा पसून पयस गेल्यात, त्या सगल्यांक वांगडा घेवन मांद्रें मतदार संघांतली कॉंग्रेस पक्ष संघटना घटमूट करपा खातीर आपूण काम करतलों. ७०० परस चड समर्थकांक वांगडा घेवन १ मार्चाक आपूण कॉंग्रेस पक्षांत प्रवेश करतलों, अणीं म्हायती आम आदमी पक्षाचे फुडारी, आदले सरपंच देवेंद्र प्रभुदेसाय हांणी पत्रकार परिशदेंत दिली.
प्रभुदेसाय हांणी आम आदमी पक्षाचें मुळावें वांगडीपद हालींच सोडलां. तांणी १ तारखेर पार्सेच्या श्री भगवती देवळाच्या सभाघरांत कॉंग्रेस पक्षांत प्रवेश करपा खातीर समर्थकांच्यो भेटी घेवपाचेर भर दिल्या. उपरांत प्रभुदेसाय हांणी पत्रकार परिशद आयोजीत करून आपूण कॉंग्रेस प्रवेश करतले अशें जाहीर केलें.
आपूण फाटल्या स म्हयन्यां सावन कॉंग्रेस पक्षांत प्रवेश करपाचो विचार केलो. हालींच जाल्ल्या लोकसभेच्या वेंचणुकेंत कॉंग्रेस पक्ष, गोवा फॉरवर्ड, आम आदमी पक्षाची युती जाली. युती जाले उपरांत सगळ्यांनी मेळून उत्तर आनी दक्षीण लोकसभेचे वेंचणुके खातीर जे काम केलां त्या कामाची दखल सगळ्यांनीच घेवपाक जाय.
भाजपाक एकूच पर्याय म्हळ्यार कॉंग्रेस
भाजपाच्या आड जर सगळे एकठांय आयल्यार भाजपाक टक्कर दिवपाची तांक विरोधी पक्षांत आसा. ह्या सरकाराक निखळवापक आतां समविचारी नागरिकांनी एकठांय येवपाची गरज आसा. बदल करपाची तांक कॉंग्रेस पक्षांत आसा. हांव फाटलीं २८ वर्सां राजकारणांत आनी सामाजीक मळार कार्यरत आसा. विद्यार्थी संघटणे वरवीं आमी चळवळ उबारली, लोकांचे प्रस्न घेवन रस्त्यार आयलों. विंगड विंगड पक्षांत काम केलें. नेतृत्व बदल करपाकूय काम केलें. बर्याच लोकांक मजत केली. मात वेंचून आयिल्ल्या लोकप्रतिनिधी लोकां वांगडा रावनात. ते सरकारांत वचून लोकांच्या आड काम करतात असो दावो प्रभुदेसाय हांणी केलो.
जनतेक येवजण्यांचो लाव मेळना
भाजपान जायत्यो येवजण्यो राबयल्यो. मात त्यो येवजण्यो गरजेवंतां मेरेन पावनात असो दावो प्रभुदेसाय हांणी केलो. आवाज काडप्यां आड सरकार चेंपण हाडटा आनी पुलीस, सरकारी यंत्रणां वापरून तांचो आवाज बंद करपाचो यत्न करपाचे प्रकार घडटात. तुयेंचें हॉस्पिटल आजूनय कित्याक जायना? हे विशीं आमी चळवळ उबी केली. तेंय हॉस्पिटल सुरू जावपाक जाय अशें मत तांणी उक्तायलें.
आम आदमी पक्षा कडेन म्हजें कसलेंच वायटपण ना. आम आदमी पक्षाचें काम बरे तरेन चालू आशिल्लें. चालूच उरतलें. मात, आपूण कॉंग्रेस पक्षांत प्रवेश करून पक्ष घटमूट करतलों अशेंय प्रभूदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
