भांगरभूंय | प्रतिनिधी
पणजी : समिती तशेंच भाविकांक विस्वासांत घेनासतना मध्यानरातीं श्रीखाप्रेश्वराची मुर्ती कटरान कापून दुसरे कडेन हालोवपाची कृती हिंदू आनी पर्वरीच्या वाठारांतल्या भक्तांची भावना दुखोवपी आसा. देवूळ मोडपाच्या वेळार नोटीस दिवपाची गरज आशिल्ली. तशेंच देवूळ थंयच्यान हालयनासतना उड्डाणपूलाचें काम पुराय करप सहज शक्य आशिल्लें, अशें हो वाठार पळयले उपरांत लक्षांत येता, अशें कॉंग्रेसीचे प्रभारी माणिकराव ठाकरे हांणी म्हणलें.
गोंयच्यान भायर सरचे पयलीं माणिकराव ठाकरे हांणी सुकूरच्या श्रीखाप्रेश्वर देवळाचे सुवातेक भेट दिली. ह्या वेळार तांचे वांगडा काँग्रेस अध्यक्ष अमित पाटकार, विजय भिके, राजन घाटे आनी हेर वावुरपी हजर आशिल्ले.
काँग्रेसच्या संघटनात्मक कार्याचो नियाळ घेवपा खातीर माणिकराव ठाकरे हे दोन दीस गोंयांत आशिल्ले. गोंयच्यान भायर सरचे पयलीं तांणी आयतारा श्रीखाप्रेश्वर देवळाचे सुवातेक भेट दिली. उदरगतीक आमचो वा हेर कोणाचोच विरोध ना. तरी सगळ्यांक विस्वासांत घेवन उदरगत जावपाक जाय. उड्डाणपुला खातीर खाप्रेश्वर देवूळ काडपाचें आशिल्लें, तर तशी नोटीस दिवपाक जाय आशिल्ली. भावीक आनी समिती कडेन चर्चा करून तोडगो काडपाचो यत्न जावपाक जाय. तरी सरकार आनी कंत्राटदारांक मध्यानरातीच्या काळखांत कटरान मुर्ती कापून दुसरे कडेन व्हेली. विधी करून मुर्ती काडिल्ली जाल्यार जनतेच्या भावनांचो आदर उरपाचो. मुर्ती काडपाची कृती आनी पद्धत सामकी अयोग्य आसा. तशेंच एकंदरीत उड्डाणपुलाचें स्वरूप आनी सरभोंवतणचो जागो पळयल्यार देवूळ दवरून उड्डाणपुलाचें काम पुराय करप सहज शक्य जावपाचें. देवूळ वाटावपाचो यत्न सरकार आनी संबंधीतां कडल्यान जावंक ना, अशेंय ठाकरे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
