भांगरभूंय | प्रतिनिधी
दुबावीत आरोपीक 24 वरां भितर अटक
कोरगांव: देवूळवाडो धारगळे मरण आयिल्लो धेना प्रसन्न तुडू (38) ह्या मजुराचो खून जाल्ल्याचें मरणा उपरांतचे तपासणे उपरांत सिद्ध जालें. उपरांत पेडणें पुलिसांनी गतीन तपास करून दुबावीत आरोपी मूळ अस्तंत बंगाल आनी सद्या देवूळवाड्यार रावपी सफीक सुबिदाली शेख (24) ह्या मजुराक अटक केली.
मेळिल्ले म्हायती प्रमाण सोमारा दनपारां देवूळवाडो धारगळे सुरेश कारापूरकार ह्या कंत्राटदारा कडेन धेना प्रसन्न तुडू आनी सफीक सुबिदाली शेख हे दोगूय मजूर कामाक आशिल्ले. दोगूय अस्तंत बंगालांतले. ते देवूळवाड्यार एकेच कुडीत रावताले. सोमारा दनपारां धेना तुडू हो रावतले कुडींतूच मरण आयिल्ले अवस्थेंत सांपडिल्ल्यान कंत्राटदार कारापूरकारान पेडणें पुलिशेंत कागाळ नोंद केली. तुडूची मरणा उपरांतची तपासणी केले उपरांत ताका मारपेट केल्ल्यान मरण आयिल्ल्याचें स्पश्ट जालें.
पेडणें पुलीस स्टेशनाचे निरिक्षक दत्ताराम रावत हांच्या मार्गदर्शना खाला उपनिरिक्षक विवेक हळर्णकार, बायल पुलीस उपनिरिक्षक सुमेधा नायक, कॉन्स्टेबल देविदास मालकार, स्वप्नील शिरोडकार, रोहन वेंगुर्लेंकार, प्रेमनाथ सावळ देसाय, यशोदास उगवेंकार, ड्रायव्हर व्हिन्सी डायस, समीर नायक हांणी सफीक सुबिदाली शेखाचो सोद घेवन 24 वरां भितर ताका अटक केली.
पुलीस अधिक्षक शेखर प्रभुदेसाय, पेडणें पुलीस स्टेशनाचे उपअधिक्षक सिद्धांत शिरोडकार हांच्या मार्गदर्शना खाला पेडणें पुलीस स्टेशनाचे निरिक्षक दत्ताराम रावत हे फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
