देवी म्हागौरी

भांगरभूंय | प्रतिनिधी

नवरात्रां : माळ आठवी

नवरात्रांची आठवी माळ म्हागौरीक समर्पित केल्या. ह्या दिसा प्रत्येक इत्सा पुराय करपाची तांक म्हागौरी कडेन आसा अशें म्हणटात. म्हा म्हणचें व्हड गौरी म्हळ्यार गोरी, उजळ कांतीची. म्हागौरी बैलार बसता आनी सदां तिची प्रतिमा ती गोरी म्हूण धव्या रंगान पितारतात. देवीचे चार हात आसात.  एका हातांत त्रिशूल, दुसऱ्या हातांत डमरू आसा. बाकीच्या दोनूय हातांनी देवी आपल्या उपसकांक भरभरून आशिर्वाद दिता. म्हागौरी ही शुद्धतेचें प्रतीक जाल्ल्यान ती धव्या रंगाच्या पाड्यार चित्रीत करता.  गोरी गौरी भांगराळो कांठ आशिल्ली धवी साडी न्हेसल्या.  

म्हागौरिचें पयलींचें नांव उमा. देवी उमाक शिव हो आपलो घरकार म्हूण मेळचो म्हण खर इत्सा आसली.  ताका लागून देवी उमान खर तप केलें. ह्याच तपाक लागून देवी उमाची सगळी कूड एकदम काळी पडली. तपाक लागून म्हादेव तिचेर खोशी जाता आनी तिचो स्विकार करता. म्हादेव देवीचें सगळें आंग गंगेच्या उदकांत धुवन काडटा. मागीर देवी एकदम उजळटा आनी गोरी- गोरी जाता. तेन्नाच तिका गौरी अशें नांव म्हादेव दिता. म्हादेवाची म्हागौरी. ह्याच तिच्या रुपाक लागून प्रार्थना करतना देव, रुशी म्हणटात. सर्वमंगल मंगलये, शिवे सर्वार्थ साधिके, शरण्य त्रिंबके गौरी नारायणी नमोस्तुते.”

ह्याच संबंधान आनीक एक काणी आसा. एकदा खंय एक शींव खूब दीस उपाशी आसलो. जेवण सोदीत- सोदीत तो देवी उमा तप करपाक बसलल्या जाग्यार पावलो.  देवीक पळोवन शिंवाची भूक वाडली.  तप सोंपून देवी केन्ना उठ्ठा काय म्हूण शींव देवीची वाट पळेवपाक थंयच बसलो. देवीची वाट पळयत शींव खूब असक्त जालो. तप सोंपले बरोबर देवीन शिंवाक पळयलो. शिंवाची दशा पळेवन देवीक ताची काकुळट दिसली. देवीक ताका आपलें वाहन केलें. देवीक दिसलें की शिंवानूय एका प्रकारचें तप केल्लें आनी त्या तपाचें फळ म्हूण तिणें ताका आपलें वाहन केलें. ताका लागून  गौरी देवीचीं दोन वाहनां बैल आनी शींव. 

गोंय आनी नवरात्रांतली अष्टम हातूंत एक खाशेलेपण आसा.  महालक्ष्मीचो दीस सुक्रार म्हूण हिंदू धर्म मानता. पूण नवरात्रांतले अष्टमी दिसा कांय ब्राह्मण घराण्यांनी महालक्ष्मीची पुजा जाता. आपल्या घरकाराक आरोग्यदायी आयुष्य फावो जांव, घराब्याची भरभराट जांव म्हूण सवाशिणी बायलां ही आराधना  करतात. पुजेक सुरय तांदळाच्या पिठाक उकड काडून घेतात, उपरांत हे उकडीचो एके बायलेची मूर्त (म्हालक्ष्मीची मूर्त तकलेंत दवरून) तयार करतात.  ती बरेच कलाकुसरीन करची पडटा, करतना एकूय वेर येंवक जायना अशी धारणा आसा. (हाचे फाटलें कारण कळूंक शकलें ना). महालक्ष्मीची उपासना करपी बायलां सोळा सुक्रार कडक रितीन उपास करून अनवाळसाण पाळून करतात. 

नवरात्रांच्या अष्टमी दिसा उकडीच्या पिठाचे मुर्तीक घरा केल्ल्या (सेंद्रीय) रंगांनी बरी रंगयतात, घरांतल्या भांगराच्या वस्तीच्या नगांनी तिका नेटयतात, साडी न्हेसयतात, पांचवी कांकणां घालतात, देवाऱ्यांत पुजेक लायतात. म्हालक्ष्मीचें उपासना सोळा सुक्रार करतात, पूण ह्या दिसा पुजेचे सगळें साहित्य सोळा आंकडो धरून घेतात आनी सगळें साहित्य तांदळाच्यो पिठाचें करतात. सोळा सुतां, सोळा पानां, सोळा पणट्यो, सोळा फुलां वापरतात म्हण सविता विठ्ठल मिरिंगकार, शिरोडा हिचे कडल्यान ही म्हायती कळ्ळ्या. व्हडा दबाज्यान तरेकवार शिवराक जेवणाचो म्हाप्रसाद पुजेक येतल्या लोकांक दवरतात. हे आठवे रातीक रातभर  घागरी फुंकप, तरेतरेच्यो  फुगड्यो घालप, असल्या तरेचे खेळ नाच करून रात जागयतात. चड करून नवें लग्न जाल्ल्या घरांनी ही नवरात्र अष्टमीक म्हालक्ष्मी पुजा करतात. सोळा फावटीं जप माळेन जप केल्यार 10 दशलक्ष फावटीं जप केल्ल्यान जमा जाता असो संदर्भ मेळता तशेंच काय सोळा सुक्रार म्हालक्ष्मीची उपासना केल्यार 10 दशलक्ष फावटीं केल्ल्याचें पुण्य मेळता काय?

प्रिता परब