देवी अहिल्याबाई होळकार हांचें देशा खातीर महत्वाचें योगदानः मुख्यमंत्री

भांगरभूंय | प्रतिनिधी

सांखळे देवी अहिल्याबाई होळकार हांची 300 वी जयंती मनयली

दिवचलः देवी अहिल्याबाई होळकार हांणी नारी शक्तीच्या खऱ्या भावनांचे मूर्तिमंत रूप धारण करुन देशा खातीर महत्वाचें योगदान दिलें. तशेंच आवय भशेन भुरग्यांची जतनाय घेवन आनी दयाळू आनी न्याय्य प्रशासन हे खातीर म्हत्वाचें योगदान दिलें. संस्कार विचार आचार मतींत दवरून बायलांनी राज्याचे उदरगती खातीर योगदान दिवचें अशें प्रतिपादन मुख्यमंत्री डॉ. प्रमोद सावंत हांणी केलें.
सांखळेतल्या रवींद्र भवनांत देवी अहिल्याबाई होळकार हांची 300व्या जयंती सुवाळ्यांत ते उलयताले. ह्या वेळार जिल्लो अध्यक्ष गोपाळ सुर्लीकार, मंडळ अध्यक्ष रामा नायक, नगराध्यक्ष सिद्धी प्रभु, सुलक्षणा सावंत आनी हेर मानेस्त हाजीर आशिल्ले.

सनातन धर्माच्या पुनरुज्जीवनांत, खास करून भारतांतल्या प्रतिष्ठित काशी विश्वनाथ सयत पवित्र देवळांच्या जीर्णोद्धारा वरवीं तांणी केल्ले अतुलनीय यत्न फुडल्या जायत्या पिळग्यांक प्रेरणा दितात. तांच्या दायजा वयल्यान बळगें मेळोवपाक आनी तांणी तयार केल्लो मार्ग आपणावपाक आमी कटिबद्ध आसात. एक विकसीत भारत तयार करप आनी आमचें राज्य समावेशक आनी समग्र उदरगती कडेन व्हरप हो आमचो प्रामाणीक यत्न आसा. हातूंत नारी शक्तीन योगदान दिवपा खातीर फुडाकार घेवप गरजेचें आसा. तशेंच वेगवेगळ्या मळार बायलांनी फुडाकार घेवन योगदान दिवचें अशें डॉ. सावंत हांणी सांगलें.