भांगरभूंय | प्रतिनिधी
म्हापशेंची फामाद बोडगेश्वराची जात्रा 12 जानेवारीच्यान सुरू जाता. ते निमतान
बोडगेश्वरा राखणदारा
तुं सगल्यांचो पालनहारा
भक्तांच्या उल्याक धांवून येता
ताचें संकश्ट विघ्न पयस करता
वाट चुकिल्ल्यांक वाट दाखयता,
तुजे मशालीचो उजवाड घालता….
म्हापशें शाराचे मदीं पाचव्याचार शेतांनी आशिल्लें देव बोडगेश्वराचें देवूळ म्हणल्यार गोंयकारांचें श्रद्धास्थान. गोंयां भायले लोकूय आंगवणेक पावपी ह्या देवाचे जात्रेक हाजीर रावतात. आदल्या तेंपार एका झाडाच्या मुळांत बोडगेश्वराची मुर्ती आशिल्ली. कालांतरान ते वास्तुचें व्हडल्या देवळांत रुपांतर जालें. सभामंडप आनी तातूंत आनीकय ल्हान देवळ्यो बांदल्यात. मदोमद एक व्हडलें झाड आनी तांच्या कुशीकूच बोडगेश्वराची सुंदर, तेजस्वी, धिप्पाड संगमरवरी मुर्त. तिचें आकर्शक रुप. माथ्याक व्हडलो फेटो, खांद्यार भरजरी शाल, पिळदार पिश्यो, धोतर, हातांत भांगराचो दांडो आनी दुसऱ्या हातांत मशाल. ताच्या दोळ्यांतलें तेज पळोवन दोळे दिपून वतात. सभामंटपांतल्या खांब्यांचें कोरीव नक्षीकाम, देवतेच्यो मुर्ती मनाक भुरळ घालतात.
आमच्या माणकुल्या गोंयांत जायत्या वाठारांनी देवचार हो जाग्याचो राखणदार गांवाची राखण करता. लोकांच्या उल्याक धांवन येता. दर बुधवार, आयतारा आमोरेचेर चुकनासतना तेल, तुपाचो दिवो पेटयतात. ताचे मुखार नतमस्तक जातात. केळीं, नाल्ल, फुलां, उजवाती अर्पण करतात. आंगवण करतात.
जात्रेच्या दिसा भायल्या वाठारांत मिठाय, आयदनां, खेळणी, कपडे, साडयो विकपी दुकानां लागतात. फुलां, उजवाती, नाल्लाचीं दुकानां दिसतात. देवाच्या दर्शनाक आयिल्ले भावीक देवाच्या पायां कडली म्हूण एक तरी वस्तू विकत घेतातूच. हजारांनी रुपयांचें गिरायक जाता. जायते लोक आपलो वेवसाय, पूत- धुवेचें लग्न जुळोवपाक हांगा येतात. सोयरीगती करपाचें देवूळ म्हूण हें देवूळ पयलीं सावन लोकप्रीय आसा. हांगां सोयरीक केल्ल्या व्हंकलांचीं लग्नां रोखडीच जुळटात. तांचो संवसार सुखाचो जाता. देव भक्तांच्या उल्याक धांवून येता. तांचीं संकश्टां पयस करता. देवाच्या गांवकारान घाल्लें गाराणें इतलें जबरदस्त आसता की तें आयकन रावन कशें दिसता. हें देवस्थान सामकें जागृत.
भाविकांची देवा विशीं आशिल्ली भक्ती, आस्था दिसता. एका तेंपार ही जात्रा फक्त दोन दिसांचीच आसताली. मात, आतां एक- एक दीस वाडून ती पांच दिसांचेर पावल्या. फेरीय तितले दीस आसता. हांगा सत्यनारायण पुजेक, म्हाप्रसादाक लोक येतात. प्रसादाचो आस्वाद घेतात. तांची देवा वयली भक्ती नजरेक पडटा.
अशा ह्या राखणदार बोडगेश्वराक, भक्तांच्या उल्याक पावपी, आंगवणी आयकुपी, शेणिल्ल्यांक मशालीच्या उजवाडांत वाट दाखोवपी बोडगेश्वराक म्हजे कोटी कोटी नमस्कार.
– सिद्धी तिळवे
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
