देवाक वतना मडगांवच्या वेवसायिकाक अपघाती मरण

भांगरभूंय | प्रतिनिधी

मडगांवः हांगाच्या रामानंद रायकार हांकां कारवारांतल्या रेल्वे स्टेशनाचेर अपघात जावन मरण आयलें. ते आनी तांची घरकान्न केरळांतल्या साबरीमाला देवळांत दर्शना खातीर वतना बिरेस्तारा, 13 मार्चाक हो अपघात जालो.
मेळिल्ले म्हायती प्रमाण, रामानंद आनी तांची घरकान्न रेल्वेंतल्यान देव दर्शना खातीर वतालीं. 13 मार्चाक सांजवेळा 8:30 वरांचे सुमाराक कारवारांतल्या स्टेशनाचेर तांची रेल्वे थांबिल्ली. त्या वेळार रायकार उदकाची बाटली घेवपाक देंवले. ती घेवन रेल्वे चडटना रेल्वे सुरू जाली. तरीय ते रेल्वेंत चडपाचो यत्न करताले. अचकीत तोल वचून ते सकयल पडले आनी रेल्वे पोंदां चिड्डल्ले.
कारवार रेल्वे पुलिसांनी हे मरण असैमिक म्हणून नोंद केलां. रायकार मडगांवांतल्या पांडव कपेला लागसार रावताले आनी ते टेम्पो ट्रॅव्हलर वेवसायीक आशिल्ले. तांच्या फाटल्यान घरकान्न आनी दोन भुरगीं अशें कुटुंब आसा.