भांगरभूंय | प्रतिनिधी
जिल्हो वेंचणुकेंत बहिश्कार घालपाची शिटकावणी
दिवचल: मयें देवस्थानाच्या म्हाजनाच्या प्रस्नाचेर न्यायालयाचो निवाडो जावन लेगीत सेगीत फाटपुरवण करूनय सरकारा वतीन अंमलबजावणी जायनाशिल्ल्यान मयेंतल्या सुमार 400 कोरबोटकार कुटुबांतल्या मतदारांनी जिल्हो पंचायत वेंचणुकेंत बहिश्कार घालपाची शिटकावणी दिल्या. सरकारान आमच्या मागणी कडेन आडनदर केल्ल्यान ही भुमिका घेवपाचो निर्णय घेतिल्ल्याचें यशवंत कारबोटकार, मनोहर आनी हेर कारबोटकार म्हाजनांनी पत्रकार परिशदेंत स्पश्ट केलें.
1946 वर्सा सावन मयेंच्या मूळ देवस्थानाच्या मालकी हक्का खातीर सगल्या म्हाजनांनी आनी रयतांनी मयें गांव बेकायदेशीरपणान पळोवपी एवरीक ह्या पुर्तुगेज मनशा आड बंड केल्लें आनी तें येसस्वीय जाल्लें. त्या वेळार फूट घालून विशिश्ठ गटाक म्हाजन केले.
1968 वर्सा दिवचल न्यायालयांत आव्हान दिल्लें. उपरांत सर्वोच्च न्यायालयांतूय फक्त परब गट म्हाजन नासून सगले दावेदार पयलींच्या काळा सावन म्हाजन आशिल्ले. तांची आनी वारसदारांची तीन दिसांत म्हाजन वळेरेंत नोंद करची असो निकाल दिलो अशी म्हायती कारबोटकार हांणी दिली.
पूण हे विशीं परब समिती, मामलेदार, आमदार, मुख्यमंत्री आडनदर आनी टाळाटाळ करीत आसात असो आरोप कारबोटकार हांणी केलो. परब मयां रुजिल्ले आनी आमी कारबोटकार भायल्यान स्थायीक जाल्यात अशें जर सरकार समजता आसत जाल्यार तें चुकीचें आसा. आमी फाटल्या 57 वर्सांचो न्यायालयाचो वृत्तांत मुख्यमंत्र्याक दिला. ते विशींची म्हायतीय दिवपाचें स्पश्ट केल्लें. पूण सरकार आमचे कडेन सेगीत आडनदर करून दरेक फावटी पुलीस हाडून उत्सव मनयता. हो सत्तेचो गैरवापर आसून आमजी बाजू समजून घेवची आनी उपरांत आमची चूक आसल्यार आमी मान्य करतात अशें कारबोटकार हांणी सांगून कारबोटकार कुटुंबांनी जिल्हो वेंचणुकेंत बहिश्कार घालपाची शिटकावणी दिल्ल्याचें तांणी सांगलें.
आमची न्यायाची बाजू आसून लेगीत सरकार परब हांकां फाटबळ दिता. दोनूय गटांक आपोवन न्याय दिवचो नाजाल्यार आमी कारबोटकार कुटुंबांतल्या सुमार 400 मतदारांनी मतदाना दिसा बहिश्कार घालपाचो निर्णय घेतला अशें कारबोटकार हांणी पत्रकार परिशदेंत सांगलें.
ह्या वेळार मनोहर, अनील, नारायण, मोहन, अजीत, श्रीकांत, विष्णू, राजेश (सगले) कारबोटकार बी मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
