भांगरभूंय | प्रतिनिधी
गोंय सरकार ‘कोटीतीर्थ काॅरिडरा’खाला नार्वेंच्या सप्तकोटीश्वर देवळाच्या मूळ स्थानाचेर (दिवाडी) नवें सप्तकोटीश्वर देवूळ बांदतलें. थंयची तळी आनी हेर वाठार विकसीत करपाचेंय थारलां. गोंय साधनसुविधा उदरगत म्हामंडळा वतीन हें काम करपाक 10 हजार चौखण मिटर जमीन ताब्यांत घेतल्या. पुर्तुगेज काळांत मोडिल्लीं सगलीं देवळां सरकारान परत बांदून काडचीं, असो विचार फाटीं सरकारानूच उक्तायिल्लो. भक्तांनीय ताका तेंको दिल्लो. मागीर सगल्या देवळांचें प्रतीक म्हूण एकूच देवूळ बांदपाचें थारिल्लें. आतां सरकारान फुडाकार घेतिल्ल्यान सगलें बेगीन जाग्यार पडटलें, प्रत्यक्षांत येतलें अशी आस्त.
शंकराचो अवतार मानतात त्या सप्तकोटीश्वराचें देवूळ बाराव्या शेंकड्यांत कदंब घराण्यांतले राणयेन दिवाडे बांदिल्लें. आपल्या कुळदेवाक दिल्लो हो मान. ते विशींचे शिलालेखूय आसात. थंय शेंकड्यांनी भावीक येताले. 1540 च्या सुमाराक पुर्तुगेजांनी तें देवूळ मोडलें. (ताचे पयलीं 1352 त कदंब राजाचेर जैत जोडटकच बहामनी सुलतान अल्लाउद्दीन हसन गंगू हाणें तें नश्ट केल्लें, अशेंय इतिहास सांगता.) पुर्तुगेजांनी बांयचेर बसयिल्लें लिंग म्हाजनांनी नार्व्यां हाडून ताची पुनर्स्थापना केली. छत्रपती शिवाजी महाराज पुर्तुगेजांची राजधानी पोरणें गोंय काबीज करपाक आयिल्ले. तेन्ना तांणी ह्या देवळाचो जिर्णोद्धार करपाचें थारायलें. 1668 तली ही गजाल. आयज उबें आसा, तें महाराजान बांदिल्लें देवूळ. आतां सरकार उबारता त्या नव्या देवळाक लागून मूळ स्थानाचें म्हत्व जपपाक मेळटलें. ताका इतिहासीक म्हत्वूय येतलें. ह्या देवळाचे म्हाजन म्हूण कोणाक भोवमान मेळटलो काय सरकाराच्या ताब्यांत हें नवे देवूळ आसतलें, हें पयलींच स्पश्ट जाल्यार बरें. कारण म्हाजन, समितीचे जाळवणदार जावपाक गोंयांत अक्षरशा सर्त लागता. प्रचार, वेंचणुको बी जातात. दोनूय देवळां अर्थीक आनी धर्मीक नदरेन मुखार येवचीं, इतलीच आस्त.
थोड्यांक देवूळ, चर्च वा हेर कसलेंय धर्मीक थळ म्हणलें काय उस्तुरें वता. पूण, त्या थळाक लागून रोजगार मेळटा, हाचो कोण विचार करिना. तिरुपती हें एकूच उदाहरण पुरो. पर्यटन, हाॅटेल, खाणावळ, येरादारी, फुलां, प्रसाद, नाल्ल, देवळांत सेवा करपी लोक…. साबार जाणांक रोजगार मेळटा. सरकारान कोटीतीर्थ काॅरिडर उबारपाचो थारायला. मात, पर्यटनाचे नदरेन थंय साधन सुविधांचीय उबारणी जाय. पेडणें, काणकोण वा हेर खंयच्यानूय थंय वचपाचें जालें जाल्यार रस्ते गुळगुळीत जाय. रस्ते उदरगतीक व्हड योगदान दितात, हें विसरूंक फावना. सगलीं देवळां एकमेकांक रस्त्यान जोडपी ‘भक्तीमार्ग’ तयार करूं येता. जंय रस्ते आसात, ते आनीक विकसीत करचे. नवे बांदकाम मंत्री देवाचे खरे भक्त म्हणटकच ते नार्व्यांच न्हय, तर राज्यांतल्या दरेका देवळांत, चर्चींत, मशिदींनी भाविकांक वचपाक बरो, रुंद रस्तो बांदतले हातूंत दुबावूच ना. रस्त्यां वयलीं फोंडकुलां पुरोवपाचो विचार तांणी उक्तायलाच. तो दत्तजयंती येवचे पयलीं पूर्ण जावचो. पणजी- दिवाडी फेरी सुसज्ज करची पडटली. नार्व्यां आनी दिवाडेच्या दोनूय देवळांक जोडपी रुंद रस्तो जाय. खाणावळ, रावपाक हाॅटेल वा अग्रशाळा जाय. फोनाचें नॅटवर्क चड म्हत्वाचें. नार्व्यां जायते फावटी रेंज मेळना. तीय वेवस्था करची पडटली. नार्व्यां सयत गोंयांतल्या बऱ्याच देवळांनी वचपाक येरादारीची भरंवशाची सुविधा ना. दरेका घरांत गाडयो आसल्यो तरी भौशीक येरादारी ही जायच. सप्टकोटीश्वर देवळाचो कदंब राजा, छत्रपती शिवाजी महाराज हांचे कडेन संबंद आसा. पर्यटनाचे नदरेन हाचो प्रचार केल्यार फायदोच जातलो. देवस्थान पोरणें आसल्यार तातूंत इतिहासीक म्हत्वाच्यो वस्तू आसतात, त्यो पळोवपाकूय लोक येतात. पोरण्यां गोंयां चर्चींत वस्तुसंग्रहालय आसा, तशें देवळां कुशीक ल्हानशें कांय जायना, पूण तें आसचें. देवळां हीं आमची भक्तीकेंद्रां, ताचे निमतान राज्याची सर्वांगी उदरगत जावची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
