भांगरभूंय | प्रतिनिधी
मॅल्वीन फर्नांडीस : कोमुनिदाद दे बोआ एस्पेरांका दे हळदोणेंची समिती विरोधा विणें
भांगरभूंय । प्रतिनिधी
म्हापशें: सर्वोच्च न्यायालयाच्या आदेशा प्रमाण रामतळें आनी साईनगरांतल्या कोनुनिदादचे जमनीर बांदिल्लीं सगळीं बेकायदो बांदकामां मोडटले. मात आमी केन्नाच देवळाक हात लावचे नात, अशी म्हायती कोमुनिदाद दे बोआ एस्पेरांका दे हळदोणेंचे नव्यान वेंचून आयिल्ले अध्यक्ष मेल्वीन फर्नांडीस हांणी दिली.
आयतारा 2 फेब्रुवारीक हळदोण्यां कोमुनिदाद दे बोआ एस्पेरांका दे हळदोणाची वेंचणूक जाली. ह्या वेळार गांवकारांनी मेल्वीन फर्नांडीस हांच्या अध्यक्षपदा काला पुराय वेवस्थापन समितीची विरोधा विणें निवड केली.
अॅटर्नी मेल्रॉय फेर्राव, भांडारी जेरेमियास फर्नांडीस, उपाध्यक्ष सावियो फर्नांडीस, जोडअॅटर्नी बेंजामीन आफोन्सो आनी उपभांडारी आगुस्तीन आल्कांतारा हांचो हे नवे कार्यकारिणींत आस्पाव आसा. ही समिती 2025 ते 2028 ह्या तीन वर्सांच्या काळा खातीर आसा.
निवडी उपरांत अध्यक्ष मेल्वीन फर्नांडीस पत्रकारां कडेन उलयताले. तांणी सांगलें, आपणें सगळ्या गांवकारांक उतर दिलां, कोमिनिदादीचे जमनीर बेकायदो बांदिल्लीं घरां कितलींय पोरणीं आसलीं तरीय तीं सवोच्च न्यायालयाच्या आदेशा प्रमाण मोडटले.
रामतळें आनी साईनगरांतल्या कोमुनिदादीचे जमनीर बांदिल्लीं सुमार 60 घरां बेकायदो आसात. आपणाक दिसना त्या घरांक न्यायालयांत राखण मेळटलीं, पूण आमी देवळाक हात लावचे नात, अशें मेल्वीन हांणी स्पश्ट केलें.
वेंचणूक शांततायेन जाल्ले खातीर मेल्वीन हांणी खोस उक्तायली. आमची समिती गांवकारां खातीर, गांवकार आनी गांवकारांचीच आसा, अशेंय तांणी सांगलें. आमचे कोमुनिदादींत खंयचोच राजकारणी हस्तक्षेप करचो ना, हाचेर आमचो विस्वास आसा. राजकारण्यांनी वेंचणूक प्रकियेंत वा कोमुनिदादीच्या कामकाजांत हस्तक्षेप करचो न्हय, हो संदेश सगळ्या कोमुनिदादींनी वचपाक जाय. जर हें केलें जाल्यार आमची एकता कायम उरतली, अशें मेल्वीन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
