भांगरभूंय | प्रतिनिधी
कर्नाटकांत सध्या काँग्रेसीचें सरकार आसा, म्हणटकच केंद्र सरकार आनी तांच्या धोरणां आड. तांणी निर्णय घेवप सभावीकूच. फाटलें वर्सभर वादग्रस्त थारिल्लें कर्नाटक हिंदू धर्मीक संस्थान आनी धर्मादाय दान (दुरुस्ती) विधेयक 2024 राज्यपाल थावरसिंह गेहलोट हांणी शेनवारा राष्ट्रपतींक धाडलां. हाचे आदीं तांणी तें राज्य सरकाराक परत धाडिल्लें. मात, घडये सर्वोच्च न्यायालयाच्या निर्णयाक लागून तांणी तें स्विकारुन वयर धाडलां आसतलें. कारण राज्य सरकारान संमत केल्लीं विधेयकां थारावीक वेळांत स्विकारचीं वा न्हयकारचीं, तीं फायलींत बांदून दवरचीं न्हय, अशें न्यायालयान राज्यपालांक सांगिल्लें. हें विधेयक कर्नाटक विधानसभेन मंजूर केलां. फाटल्या मार्चा सावन तें राज्यपालां कडेन पडून आसा. हो निर्देश राज्यपालां पुरतो मर्यादीत ना. राष्ट्रपतींकूय तीन म्हयन्यांच्या भितर कितें तो निर्णय घेवचो पडटलो. सर्वोच्च न्यायालयाच्या ह्या निर्णयाक लागून विधेयकां फायलींनी आडकून उरपाचें बंद जातलें. उदरगतीचीं कामां आनी हेर म्हत्वाच्या फायलीं बाबतींतूय अशें जाल्यार बरें.
कर्नाटक सरकारान मंजूर केल्लें विधेयका आड विरोधकांनी आवाज केल्लो. निदर्शनांय केल्लीं. कितें आसा ह्या विधेयकांत? रु. 10 लाख ते 1 कोटींची वर्सुकी येणावळ आशिल्ल्या देवळांक आनी धर्मादाय संस्थांक पांच टक्के कर सरकाराक दिवप बंधनकारक केलां. ज्या देवळांचें उत्पन्न वर्साक 1 कोटी रुपयां वयर आसा, तांकां 10 टक्के कर दिवचो पडटलो. आतां देवळांच्या उत्पन्नांचे आॅडिट जाता. आंकडे अदीं मदीं जाहीरुय जातात. मात कांय जाणांच्या मतान येणावळ ताचे परसूय चड आसता. प्रसाद, देणग्यो, व्याज, भाडें, जमनींचें उत्पन्न अश्या साबार मार्गांनी देवळांक पयसो मेळटा. कांय व्हडलीं देवळां स्वता हाॅस्पिटलां, शिक्षण संस्था चलयतात, शिश्यवृत्तीय दितात.
तिरुमला तिरुपती देवस्थानाक अंदूं 4800 कोटी रुपया येणावळ मेळटली असो अदमास तांणी अर्थसंकल्पांत उक्तायला. वैष्णोदेवी. ट्रस्टाक पोरूं 683 कोटी रुपया मेळिल्ले. केरळांतल्या श्रीपद्मनाभस्वामी देवळाक वर्साक सादारण 700 कोटींच्या आसपास मेळटात. मुंबयच्या सिद्धीविनायक देवळाक पोरूं 133 कोटी रुपया मेळिल्ले, साईबाबा देवळाक सादारण 100 कोटी मेळटात. नांवाजतीं देवळां, इगर्जो, दर्गे सरासरी वर्साक 100 कोटी वा ताचे परस चड जोडटात. हो पयसो संबंदीत प्रार्थना थळांचेर खर्च जाता. थोडो वैजकी, शिक्षणीक मळाचेर. मुखेलपणान व्याजाचेर हें काम चलता. हांगा येवपी भक्तांचो आंकडो मात्तूय उणो जावंक ना. उरफाटी समाजाची अर्थीक बाजू घटमूट जाल्ल्यान चडांत चड लोक देवळां, इगर्जो, दर्गे भोंवपाक लागल्यात. घडये मानसीक, घरगुती समस्या, संकश्टां वाडिल्ल्यानूय गर्दी जाता जावंये.
कर्नाटक सरकार ‘एकत्रित निधीं’त कर एकठांय करतले. तो वर्साक पांच लाख वा ताचे परस उणें जोडपी ल्हान देवळांची देखभाली खातीर वापरतले. गरीब पुरयतांची अर्थीक स्थिती सुदारची म्हूण वापरतले. (देवळाच्या हेर सेवेकरींचो उल्लेख विधेयकांत आसतलो, अशी आस्त बाळगुया.) पुरयतांच्या भुरग्यांक उच्च शिक्षण मेळचें म्हूण कांय निधी खर्च करतले. शिता पयलीं मीठ खांवक जायना, ही गजाल खरी पूण ह्या निधीचो योग्य वापर जातलोच हाची खात्री दिवं नजं. कारण खंयचेंय सरकार आसलें तरी हात मारपी अधिकारी सक्रीय आसतातूच. विरोधी भाजपाक अशेंच दिसता. हें काँग्रेसीचें हिंदू विरोधी धोरण आनी ह्या निधींत भानगडीं, गैरप्रकार जातलो, हिंसाचारुय जातलो, असो दावो तांणी केला. राज्याची तिजोरी सध्या रिकामी आसा, ताका लागून ती भरपाक हें नवें विधेयक, अशेंय तांकां दिसता.
कांय जाणांच्या मतान, देवळांचो पयसो जाळवणदारूय स्वताच्या कामा खातीर वापरतात. अर्थांत तो परत हाडून दितात. तो सोंपेपणी मेळटा. आतां हें खरें काय फट तें देवळांचे समितीचेर वचपाक सर्त करप्यांकूच खबर आसतलें. आमच्या गोंयांत पसून कांय देवळांच्यो समिती वादग्रस्त थारल्यात. तांचेर आरोप करप्यां आड वाॅरंट भायर सरल्यात, थोड्यांक माफीय मागची पडल्या. शिरगांवां जात्रे वेळार अशीर रस्त्याचेर खेटाखेट जावन स भाविकांक मरण येतकच थंयूय समिती आड बोवाळ जालो. समिती आनी म्हाजनांचे कालचे बसकेंत मरण आयिल्ल्यांक 1-1 लाख रुपया दिवपाचें थारायलां. जात्रे वेळार आमी उपाय घेतिल्ले, तेन्ना हे घडणुकेक देवस्थान समितीक जापसालदार धरतात तें चुकीचें अशें समिती म्हणटा. देशांतल्या देवस्थान समितींनी येणावळींतलो कांय वांटो सुरक्षा वेवस्थेचेरुय खर्च करूंक जाय. कारण कांय कडेन जात्रा, उत्सवां वेळार गर्दी जाता. भावीक चिड्डून जखमी जावपाच्यो, मरपाच्यो घडणुको सगल्याच व्हडल्या देवळांनी घडल्यात. भाविकांनीय शिस्त पाळूंक जाय.
कर्नाटक सरकारान देवळां कडल्यान कर घेवपाचें थारायलां. तांणी तो फक्त देवळां कडल्यान घेवचे परस, इगर्जो, मशिदीं आनी हेर धर्मीक थळां कडल्यानूय घेवचो, असो आग्रो विरोधकांनी धरला. अर्थांत तातूंत चूक कांय ना. सगल्या देवळांचेर सरकाराचें थेट नियंत्रण आसा, मात हेर धर्मांच्या थळां कडेन तें आडनदर करता, अशेंय तांचें म्हणणें. बऱ्याच लोकांचो ह्या विधेयकाक तेंको आसा. आनी विरोधूय, म्हणटकच तें मंजूर जाल्यार कर्नाटकांत बोवाळ जावपाची शक्यताय न्हयकारपाक येना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
