भांगरभूंय | प्रतिनिधी
वाळपय: उर्मिला गांवकार हांणी नगरगांव पंचायतीच्या सरपंचपदाचो राजिनामो दिले उपरांत तांचे सुवातेर देवयानी गांवकार हांची सरपंचपदार निवड जाली. काल घेतिल्ले पंच वांगड्यांचे बसकेंत देवयानी गांवकार हांची बिनविरोध निवड जाल्ल्याची घोशणा वेंचणूक अधिकाऱ्यांनी केली.
नगरगांव पंचायतीच्या सरपंचपदार उर्मिला गांवस हांणी कांय दिसां पयलीं पदाचो राजिनामो दिल्लो. उपरांत पंचायत संचालकांनी नव्या सरपंचपदा खातीर वेंचणूक घेवपाचे निदेश दिल्ले. ही वेंचणूक काल 30 मार्च दिसा निश्चीत केल्ली.
पंचायत कचेरेंत हे विशींची प्रक्रिया सकाळीं हातांत घेतली. सरपंचपदा खातीर देवयानी गांवकार हांचो एकूच अर्ज सादर जालो. सदर अर्जाची छाननी केले उपरांत उमेदवारी अर्ज वैध थारायलो. उपरांत वेंचणूक अधिकाऱ्यांनी देवयानी गांवकार हांची नगरगांव पंचायतीच्या सरपंचपदार बिनविरोध निवड जाल्ल्याची घोशणा केली. ह्या वेळार हाजीर आशिल्ल्या पंच वांगड्यांनी नव्यो सरपंच देवयानी गांवकार हांकां फुलांतुरो भेटोवन अभिनंदन केलें.
मजगतीं, नव्यो सरपंच देवयानी गांवकार हांणी सांगलें, पंचायतीच्या उदरगतीच्या कामांक प्राधान्य दितले. हाचे पयलींच्या सरपंचांनी बरें काम केलां. उरिल्लीं विकासकामां पुराय करपा खातीर यत्न करतले. तशेंच विश्वजीत राणे हांच्या मार्गदर्शना खाला विवीध खात्यांतलो निधी पंचायत वाठाराच्या विकासा खातीर वापरतले आनी ते खातीर लोकांनी सहकार्य करचें अशें आवाहन तांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
