देवनागरी – रोमी वादाक पूर्णविराम

भांगरभूंय | प्रतिनिधी

मुख्यमंत्री डॉ. प्रमोद सावंत हांणी उक्तायलें समाधान

वस्तुस्थिती सगल्या गोंयकारां मुखार येवप गरजेचें आशिल्लें

1972 च्या आदल्या घरांक सनदी दिवपाची आपलीच संकल्पना

भांगरभूंय । प्रतिनिधी

सांखळी : कोंकणी संबंदांत आपणे विधानसभेंत केल्लें भाशण ही वस्तुस्थिती आशिल्ली. पुराय गोंयच्या आनी गोंयकारां मुखार तें येवप गरजेचें आशिल्लें. खूब जाण रोमी आनी देवनागरी कोंकणी हांचे मदीं वाद निर्माण करून धर्मीक नसाय निर्माण करपाचो यत्न करतात, ताका पूर्णविराम मेळ्ळा. खूबश्या बऱ्या कायदेतज्ञांनी रोमी कोंकणी आनी देवनागरी कोंकणी संबंदांत मुद्दे मांडिल्ले. पूण आपणे विधानसभेंत मांडिल्लें स्पश्टीकरण हें खरें आनी वस्तुस्थितीक धरून आशिल्लें. खूब जाणांनी ताचेर टिका लेगीत केली. पूण आपणाक ताचें कांयच पडून वचूंक ना. गोंय वेगळें राज्य घोशीत करतना कोंकणी भाशेच्या आदाराचेरूच कोंकणी राज्य म्हूण वेगळें अस्तित्व सिद्ध करपाक शकलें, अशें मुख्यमंत्री डॉ. प्रमोद सावंत हांणी सांगलें.

देवनागरी कोंकणी संबंदांत मुख्यमंत्र्यान घेतिल्ले भुमिकेक लागून तांकां परबीं दिवचे खातीर गोंयांतल्या कोंकणी मोगी आनी साहित्यिकांनी तांची भेट घेतली. तांचे मदीं गोवा कोंकणी अकादेमीचे अध्यक्ष पूर्णानंद च्यारी, सांखळी रवींद्र भवनाचे उपाध्यक्ष दत्ताराम चिमुलकार, ज्येश्ठ साहित्यीक दिलीप बोरकार, चित्रपट निर्माती ज्योती कुंकळकार, संपदा कुंकळकार, कोंकणी लेखक संघाचे मिलींद भरणे, कोंकणी नाटक आनी संगीत अकादेमीचे अध्यक्ष श्रीधर कामत बांबोळकार, भांगराळें गोंय अस्मितायचे सचीव पंढरीनाथ परब, दिवचल कोंकणी सेवा केंद्राचे अध्यक्ष रुपेश ठाणेकार, विनायक गोवेकार, राजन उसपकार, सांखळी कोंकणी सेवा केंद्राचे अध्यक्ष श्याम फातर्फेकार, भिकू बोमी नायक, विवेक पिसुर्लेकार, विठ्ठल आवंडेकार आनी हेर मानेस्तांचो आस्पाव आशिल्लो.

1961 सावन आयज मेरेन घरांचे विशय सुटूंक नाशिल्ले. मूळ गोंयकार आपल्या रावता त्या घराचो विशय स्वताच हुमकळयत आशिल्ले. 1972 आदींच्या घरांक सनदी दिवपाचें काम आपले संकल्पनेंतल्यान आयलें. आल्वारा, मोकासो जमनी वयल्या घरांचो विशय तुमच्या सारक्या साहित्यिकांनीच मुखार हाडलो. तोवूय आपल्या फुडारपणा खालच्या सरकारा वतीन सोडयतात. होवूय एक गोंय गोंय घडोवपाचो आनी गोंयकारांक सुरक्षीत आलाशिरो दिवपाचो विशय आसा. ताची संद आपल्याक मेळ्ळी हे खातीरूय समाधान दिसता.

मुख्यमंत्र्यांचें काम हें फक्त राज्य चलोवप इतलेंच न्हय जल्यार राज्य घडोवपाचेंय आसा. कोंकणी खातीर ठोस निर्णय आनी गोंयची भुमिका स्पश्ट करपी मुख्यमंत्री आपणे पयलेच खेपे पळयलो. फुडारांत कोंकणी भाशा मंडळ आनी कोंकणी मोगीं कडल्यान तुमकां सगले तरेचो आदार आनी तेंको मेळटलो, अशें साहित्य अकादेमी पुरस्कार फावो जाल्ले ज्येश्ठ साहित्यीक दिलीप बोरकार हांणी म्हणलें.

मुख्यमंत्री डॉ. प्रमोद सावंत हांची अभ्यासू वृत्ती आनी खंबीर फुडारपणाक लागून नवे पिळगेक नवी नदर मेळ्ळ्या, अशी भावना आयज आमचें मदीं निर्माण जल्या. स्वता मुख्यमंत्र्यांनी विधानसभेंत हो विशय स्पश्टपणान मांडिल्ल्यान नवी वैचारीक क्रांती निर्माण जाल्या. कोंकणी भाशा, गोंय आनी गोंयच्या अस्तित्वा खातीर तुमचो आदार सदांच मेळटलो आनी तुमचें फुडारपण गोंयाक सदांच मेळूं, अशी आयज दरेका गोंयकारांची भावना आसा, अशें गोवा कोंकणी अकादेमीचे अध्यक्ष डॉ. पूर्णानंद च्यारी हांणी म्हणलें.

कोंकणी भाशे वांगडा रावून गोंयांतली कोंकणीची सुवात आनी गोंयची कोंकणी खातीर आशिल्ली अस्मिताय स्पश्टपणान मांडली. पयलेच खेपे आमी सगले साहित्यीक एका मुख्यमंत्र्यांक तेंको दितात. तुमचें धाडस, स्पश्टवक्तेपणा आमकां तशेंच कोंकणी मोगींक आवडला, अशें भिकू बोमी नायक, दत्ताराम नायक, विवेक पिसुर्लेंकार, रमेश घाडी हांणी सांगलें. गोंय सरकारान आनी मुख्यमंत्री डॉ. प्रमोद सावंत हांणी घेतिल्ली भुमिका तोखणायेची आसा. चड करून लिपींच्या संबंदांत निर्माण केल्ल्या वादाचेर मुख्यमंत्र्यांनी स्पश्ट केलां तातूंत कसलोच बदल जावचो ना, शिक्षणांत आनी हेर कामांत सगल्या वेव्हारांत कोंकणी देवनागरी लिपयेंतूच काम चलतलें, अश्या उतरांनी सांगून हो विशयेच सोंपयला. तांचे हे भुमिकेक आमी सगले येवकार दितात, अशें विठ्ठल आवंडेकार हांणी सांगलें.

‘विशय विधानसभेंत मांडून स्पश्ट करपाचें समाधान’

नव्या शिक्षणीक धोरणा प्रमाण आपलो विचार स्पश्ट आशिल्लो. प्रधानमंत्री नरेंद्र मोदी हांणी दूरदिश्टी दवरून प्रादेशीक भाशांक बळ दिवपाचो निश्चेव केला. गोंयांत रोमी कोंकणी आनी देवनागरी कोंकणी हे विशींचो विशय मांडचे खातीर हे आदीं कोणेच फुडाकार घेवंक नाशिल्लो. पूण हे खेपे आपणाक मुख्यमंत्री ह्या नात्यान हो विशय विधानसभेंत मांडून तो स्पश्ट करपाची संद मेळ्ळी, हाचें समाधान आसा, अशें मुख्यमंत्र्यान सांगलें.