भांगरभूंय | प्रतिनिधी
स्वयंपूर्ण गोंय उपक्रमा वरवीं मेळ्ळी मजत
पणजी: कुर्टी-खांडेपार पंचायत वाठारांतल्या नंदन केरये हांगा रावपी देवकी काशिनाथ गावडे हे एकोडी जीण जगपी 65 पिरायेच्या बायलेच्या घरांत 40 वर्सांनी आयज लायटीचो उजवाड पावलो. स्वयंपूर्ण गोंय उपक्रम ह्या वाठारांत नेमिल्लो. स्वयंपूर्ण इश्ट तिच्या आदाराक देवदूत कसो पावलो. तिच्या घराक लायटीचें कनेक्शन मेळोवन दिवपा खातीर स्वयंपूर्ण इश्टान तिका सगळे तरेची मदत केली. आपल्या घरांत लायटीचो उजवाड पाविल्ल्यान तिका खूब खोस भोगली. तिच्या मुखामळार हांसो दिसतालो.
देवकी काशिनाथ गावडे ही जाण्टी बायल आपल्या घोवाच्या मरणा उपरांत एकोडी जीण जगता. तिका भुरगींय ना. ती फाटल्या 40 वर्सां सावन घरांत एकटीच रावता. दयानंद सामाजीक सुरक्षा येवजणे खाला दर म्हयन्याक मेळपी 2000/- रूपयांचे अर्थीक मजतीचेर ती आपलो दिसपट्टो खर्च भागोवन कशीबशी आपली जीण सारता.
सध्या सरकारान जाण्ट्यां खातीर सुरू केल्ली देव दर्शन यात्रा देवकी गावडे हांकां आपल्या घराक लायटीचें कनेक्शन मेळपा खातीर एक कारण थारलें. देव दर्शन यात्रेविशीं कोणेंतरी तिच्या कानार घातलें. तिच्याय मनात देव दर्शनाक वचपाची इत्सा निर्माण जाली आनी तिणें स्वयंपूर्ण इश्टाकडेन संपर्क केलो. स्वयंपूर्ण इश्टा कडेन उलयतना तिणें आपली परिस्थिती तांकां सांगली. आपूण कशी एकोडी जीण जगतां. घराक लायटीचें कनेक्शन ना. रातची आपूण आपल्या भावाच्या घरा न्हिदपाक व्हरता. तशेंच हेर परिस्थितीची म्हायती तिणें स्वयंपूर्ण इश्टां लागसारा उलोवन दाखयली.
स्वयंपूर्ण मित्र सुदेश गावडे हांकां देवकी गावडे हांचे परिस्थितीची जाणीव जाली आनी तांणी तिच्या घराक लायटीचें कनेक्शन मेळोवन दिवपाची जापसालदारकी घेतली. तांणी लायटीच्या कनेक्शना खातीर पंचायती कडल्यान एनओसी घेतली आनी वीज खात्याच्या कार्यालयाकडेन सतत पाठपुरावो केल्ल्यान आयज गावडे हांकां लायटीचें कनेक्शन मेळपाक पावलें.
देवकी गावडे हांच्या घराक लायटीचें कनेक्शन दिवपा खातीर सहाय्यक लायनमन संजय गावडे, रूपेश गावडे आनी सत्यवान सतरकार हांणी सहकार्य केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
