भांगरभूंय | प्रतिनिधी
भाजपाक ३,९६७ कोटींची, जाल्यार कॉंग्रेसीक १,१२९ कोटींची देणगी
नवी दिल्ली, खबरां संस्था: वेंचणूक रोखे आसूं वा सरळ देणग्यो, दरेके सुवातेर भाजपाचे व्हटयेंत हजारांनी कोटी रुपया पडिल्ल्याचें फाटल्या कांय वर्सां सावन पळोवपाक मेळटा. २०२३-२४त भाजपाक हजारांनी कोटी रुपयांच्यो देणग्यो मेळ्ळ्यात. विशेश म्हणल्यार २०२२-२३ ह्या अर्थीक वर्सा भाजपाक मेळिल्ल्या देणग्यां मदीं २०२३-२४ वर्सा वट्ट ८७ टक्के वाड जाल्या. भाजपाक वट्ट ३,९६७.१४ कोटी रुपया देणगी स्वरुपांत मेळ्ळ्यात. पक्षाक मेळिल्ल्या वट्ट देणग्यां मदीं वेंचणूक रोख्यांचें प्रमाण उणें जाल्लें दिसता. भाजपाच्या २०२३-२४ च्या वर्सुकी लेखापरीक्षण अहवालांतल्यान (ऑडीट) ही म्हायती मुखार आयली.
मजगतीं वेंचणूक आयोगान सोमारा जाहीर केल्ल्या वर्सुकी अहवाला प्रमाण भारतीय जनता पार्टीक २०२२-२३त २,१२०.०६ कोटी रुपयांच्यो देणग्यो मेळिल्ल्यो. २०२३-२४ वर्सा ह्यो देणग्यो दुपेटीन वाडल्यात.
कॉंग्रेसीक १,१२९ कोटी रुपया देणगी
भाजपा सयत हेर पक्षांक मेळिल्ल्या देणग्यांची म्हायतीय मुखार आयल्या. ह्या अहवाला प्रमाण, सगळ्यांत चड देणग्यो मेळिल्ल्या पक्षां मदीं भाजपा उपरांत कॉंग्रेस दुसर्या नंबराचेर आसा. कॉंग्रेसीक २०२३-२४ त १,१२९ कोटी रुपया देणगी स्वरुपांत मेळ्ळ्यात. २०२२-२३ तुळेंत हातूंत वट्ट ३२० टक्के वाड जाल्या. २०२२-२३त भाजपाक २६८ कोटी रुपयांच्यो देणग्यो मेळिल्ल्यो. कॉंग्रेसीक मेळिल्ल्या वट्ट देणग्यां मदल्या ७३ टक्के वांटो वेंचणूक रोख्यांचो आसा. म्हळ्यार कॉंग्रेसीक ८२८.३६ कोटी रुपया वेंचणूक रोख्यां वरवीं मेळ्ळ्यात. २०२२-२३त ह्या पक्षाक १७१.०२ कोटी रुपया वेंचणूक रोख्यां वरवीं मेळिल्ले. दुसरे वटेन कॉंग्रेसीचो वेंचणुकेवेलो खर्चूय बरोच वाडल. कॉंग्रेसीन २०२२-२३त वेंचणुकांचेर १९२.५५ कोटी रुपया खर्च केल्ले. जाल्यार २०२३-२४ त कॉंग्रेसीन वेंचणुकेचेर ६१९.६७ कोटी रुपया खर्च केल्ले.
मजगतीं, वेंचणूक आयोगान जाहीर केल्ल्या अहवाला प्रमाण भाजपाक वेंचणूक रोख्यां वरवीं १,६८५.६२ कोटी रुपया मेळ्ळ्यात. भाजपाक मेळिल्ल्या वट्ट देणग्यां मदीं ४३ टक्के वांटो वेंचणूक रोख्यांचो आसा. २०२२-२३ त भाजपाक वेंचणूक रोख्यांवरवीं १२९४.१४ कोटी रुपया मेळिल्ले. २०२२-२३त भाजपाक मेळिल्ल्या वट्ट देणग्यां मदलो ६१ टक्के वांटो वेंचणूक रोख्यांचो आशिल्लो. फाटल्या वर्सा फेब्रुवारी म्हयन्यांत सर्वोच्च न्यायालयान वेंचणूक रोखे (इलेक्टोरल बॉण्ड) येवजण रद्द केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
