भांगरभूंय | प्रतिनिधी
पणजी : बायलां आनी बाल विकास खात्यान फाटल्या देड वर्सांच्या काळांत रस्त्यार भीक मागपी आनी त्रासांत सांपडिल्ल्या २३ भुरग्यांची सुटका केल्या. सगल्यांत चड सुटका केल्लीं प्रकरणां पणजे नोंद जाल्यांत. उपरांत कळंगूटे, अशी म्हायती खात्या वतीन दिल्या.
२०२४ आनी २०२५ अशीं दोन वर्सां भीक मागपी आनी त्रासांत सांपडिल्ल्या भुरग्यांची सुटका करपा खातीर ‘चायल्ड हेल्पलायन’चे कर्मचारी आनी पुलिसांचे मजतीन विवीध मोहिमो राबयल्यो. ह्या मोहिमेंतल्यान २३ भुरग्यांची सुटका केली. तांतल्या एका भुरग्याक ताच्या पालकांचे सुवादीन केलो. जाल्यार हेर २२ भुरग्यांक ‘अपना घर’ बालघरांत धाडलीं. हातुंतल्या दोग भुरग्यांची सुटका २०२४ वर्सा जाली, उरिल्ल्या २१ भुरग्यांची सुटका २०२५ वर्सा केली.
मजगतीं, पणजी शारांतल्या मिश्रा पेढा, कॅसिनो स्ट्रीट, आझाद मैदान, कला अकादमी जंक्शन ह्या वाठारांतल्यान भुरग्यांची सुटका केली. जाल्यार कळंगूटे वाठारांत टिटोस लेन, कळंगूटे दर्यादेग तशेंच वेर्णाचें टायटन जंक्शन, जाल्यार मडगांवच्या विद्यानगर-घोगळच्यान ह्या भुरग्यांची सुटका केली.
हे मोहिमे मजगतीं तीन प्रसंगांतल्या भीक मागपी भुरग्यांनी पुलीस आनी हॅल्पलायन कर्मचार्यांक पळोवन घडणुके सुवातेवेल्यान पळ काडपाचो यत्न केलो. हे तिनूय प्रकार पणजे शारांत घडिल्ल्याची म्हायती खात्यान दिली.
विवीध शारांनी सुटका केल्लीं भुरगीं
शार / बालक
पणजी : १३
कळंगूटे : ८
वेर्णा आनी मडगांव (दरेकी): १
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
