देड म्हयन्या भितर ४ हजार राशन कार्ड लावार्थ्यांची इ-केव्हायसी प्रक्रीया रद्द

भांगरभूंय | प्रतिनिधी

पणजीः तांत्रीक त्रुटीक लागून राशन कार्डाची इ-केव्हायसी प्रक्रीया रद्द जावपाच्या प्रमाणांत वाड जायत आसा. जुन ३० मेरेन ४१५३ लावार्थ्यांची इ-केव्हायसी रद्द जाल्ली. आतां ऑगस्ट १५ मेरेन ४१९८ जाणांची इ-केव्हायसी प्रक्रीया रद्द केल्या.
राशन कार्डा खातीर ६ लाख लावर्थ्यांनी इ-केव्हायसी केल्ली. मात तातुंतल्या सुमार ४ हजार परस चड लावर्थ्यांचे इ-केव्हायसी तांत्रीक त्रुटीक लागून रद्द जावन इ-केव्हायसी प्रक्रीया येयस्वी जावंक ना. ह्या लोकांनी आपली इ-केव्हायसी सोसायटीन वचून केल्या खरी मात जेन्ना ते मान्यताये खातीर पोर्टलाचेर येता तेन्ना कांय त्रुटींक लागून ती रद्द जाल्यात, अशी म्हायती नागरी पुरवण खात्यान दिल्या.
खात्यान दिल्ले म्हायती प्रमाण आतां मेरेन राज्यांतल्या ९.७४ लाख राशन कार्ड लावार्थ्यां मदल्या ६ लाख परस चड लावर्थ्यांनी इ-केव्हायसी प्रक्रीया पुराय केल्या. राष्ट्रीय अन्न सुरक्षा कायदो (एनएफएसए) खाला येवपी एएवाय आनी पीएचएच राशन कार्डाच्या ७४.०९ टक्के लावार्थ्यांनी जाल्यार गरीबी रेखे वयर राशन कार्डाचे ५४.०४ टक्के लावार्थ्यांनी ही प्रक्रीया पुराय केल्या.
मात हे ६ लाख लावर्थ्यां मदीं ४१९८ लावार्थी अशें आसले जांणी इ-केव्हायसी प्रक्रीया सोसयाटींत वचून आधारकार्ड लिंक करून पुराय केल्ली. पूण ते तांत्रीक त्रुटीक लागून पोर्टलाचेर तांची केव्हायसी गृहीत धरूंक ना. देखून तांची केव्हायसी मान्यताय अर्दवट उरल्या आनी तांचे अर्ज भायरायल्यात. एकदां सोसायटींत वचून ही प्रक्रीया केले उपरांत हे सगळे तपशील चाचपणी खातीर केंद्राच्या पोर्टलांत वयतात. तपासणे वेळार दिसून आयलें की, कांय लावार्थ्यांच्या आधार कार्डाच्या तपशीलांत कांय चुका आशिल्ल्यो. तांचो आधार क्रमांक आनी फिंगर प्रिंट मॅच जावपांक त्रुटी तयार जाल्ल्यान तांची इ-केव्हायसी भायरायली, अशी म्हायती अधिकार्‍यान दिली.
राष्ट्रीय अन्न सुरक्षा कायदो (एनएफएसए) खाला येवपी २३३७ लावार्थ्यांची इ-केव्हायसी भायरायल्या. तातुंतली उत्तर गोंयांत १२३७ आनी दक्षीण गोंयांत १०६४ भायरायल्यात. जाल्यार गरीबी रेशे वयल्या १८६१ राशन कार्डां लावार्थ्यांची इ-केव्हायसी प्रक्रीया भायरायल्या. तातुंतली उत्तर गोंयांत ८९६ आनी दक्षीण गोंयांत ९६५ भायरायल्यात.