भांगरभूंय | प्रतिनिधी
गरिबी रेशे वयलीं नवीं 100 कार्डां तयार
भांगरभूंय । समीप नार्वेंकार
पणजी : लाभार्थ्यांचे उत्पन्न मर्यादेंत वाड जाल्ल्यान गोंयांत फाटल्या देड म्हयन्यांत 400 परस चड रेशन कार्डां सरेंडर जाल्यात. तातूंत सगल्यांत चड गरिबी रेशे सकयलीं एनएफएसए 89 टक्के कार्डां, जाल्यार गरिबी रेशे वयलीं 10 टक्के कार्डां सरेंडर जाल्ल्या मदीं आस्पाव आसा. मजगतीं गोंयांत सुमार 100 नवीं गरिबी रेशे वयलीं रेशन कार्डां तयार जाल्यात, अशी म्हायती नागरी पुरवण खात्याच्या अधिकाऱ्यान दिल्या.
अधिकाऱ्यांनी दिल्ले आंकडेवारी प्रमाण आतां मेरेन 2.62 लाखां परस चड रेशन कार्डां गोंयांत सक्रीय आसात. तातूंतलीं राष्ट्रीय अन्न सुरक्षा कायदो (एनएफएसए) खाला पीएचएच आनी एएव्हाय 1.24 लाख कार्डां आसात जाल्यार गरिबी रेशे वयर (एपीएल) 1.37 लाख कार्डां आसात.
फाटल्या देड म्हयन्यांत रेशन कार्डांच्या सरेंडर जावपांत खुबूच वाड नोंद जाल्या. एनएफएस खाला येवपी वट्ट 387 कार्डां सरेंडर जाल्यात. गरिबी रेशे वयलीं 44 कार्डां सरेंडर जाल्यात. हे मजगतीं 387 मदल्या लाभार्थ्यांनी एनएफएसए कार्ड सरेंडर करून परत गरिबी रेशे वयल्या कार्डांक अर्ज केल्ल्या कारणान गरिबी रेशे वयलीं नवीं 103 कार्डां तयार जाल्यांत. हीं सगलीं 103 कार्डां उत्तर गोंयांत तयार जाल्यांत आनी दक्षीण गोंयांत सगलीं कार्डां सरेंडर जाल्यांत.
सरकारान रेशन कार्डां खातीर ई-केव्हायसी सक्तीचें केल्ल्यान लाभार्थ्यांच्या उत्पन्नांची म्हायती थेट सरकाराक मेळटा आनी तांचेर आळाबंद हाडपाक सरकाराक सोंपें जाता. ज्या कुटुंबांचें वर्सुकी उत्पन्न मर्यादा 50 हजार ते एक लाख मेरेन (एससी/एसटी खातीर) हुंपल्या तांणी आपली एनएफएसए कार्डां सरेंडर केल्यात. जाल्यार ज्या कुटुंबांनी 5 लाख वर्सुकी उत्पन्न मर्यादा हुंपल्या तांणी गरिबी रेशे वयलीं कार्डां सरेंडर केल्यात, अशी म्हायती अधिकाऱ्यान दिली.
मजगतीं 103 गरिबी रेशे वयल्या कार्डाची वाड जावपा फाटल्यान एका कुटुंबाचे दोन वांटे जावन वेगळे जाल्ल्या कुटुंबान आपलें नवें कार्ड तयार केलां. तशेंच तीन म्हयन्यां परस जे लोक रेशन घेनात तांचें रेशन कार्ड बंद करून दवरतात. उपरांत तें नागरी पुरवण खात्याचे जिल्हो कचेरेंत येवन लाव परत मेळोवपा खातीर तें नव्यान सक्रीय करतात. तशेंच जांणी एनएफएसए कार्ड सरेंडर केलां. तांणी गरिबी रेशे वयलें कार्ड घेतलां, अशें अधिकाऱ्यान सांगलें. उत्तर गोंयात एनएफसए सकयल येवपी 246 नवीं रेशन कार्ड सरेंडर जाल्यांत जाल्यार दक्षीण गोंयांत 141 रेशन कार्डां सरेंडर जाल्यांत. तशेंच उत्तर गोंयांत एपीएल 103 नवीं कार्डां तयार जाल्यांत आनी दक्षीण गोंयांत 44 नवीं रेशन कार्डां सरेंडर जाल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
