भांगरभूंय | प्रतिनिधी
पणजी: गोंयांत बिरेस्तारा देड दिसांच्या गणपतीचें विसर्जन केलें. गणपती बाप्पा मोरया फुडल्या वर्सा बेगीन येयात अशा गजरांत भावूक जावन बाप्पांक निरोप दिलो. हवामान खात्यान बिरेस्तारा पावसाचो ऑरेंज अलर्ट दिल्लो. पूण गोंयांत किरकोळ पावसाची नोंद जाली. पावसाची आडमेळीं नाशिल्ल्यान विसर्जन विधीत कसलीच आडखळ आयली ना. गोंयांत खूबशे कडेन मध्यरातीं उपरांतूय विसर्जन सुरू आशिल्लें.
विसर्जना पयलीं घरा कणकणीं गणपतीचें पुजन केलें. उपरांत न्हंयो, दर्या, तळयो आनी हेर पाणथळ सुवातेर विसर्जन करपा खातीर गर्दी जाल्ली. थंय आरत्यो भजना सयत फोगाची आतशबाजी केली. कुटुंबांतल्या सगल्या वांगड्यांनी एकठांय येवन भक्तीभावान बाप्प्यांच्या मुर्तीचें विसर्जन केलें.
पणजेंत मिरामार, करंझाळे दर्यादेगे सयत फेरी जेटी हांगा विसर्जन केलें. गोंयांत 35 दर्यादेगां सयत वट्ट 47 सुवातांनी दृश्टी जिवरक्षक तैनात केल्ले. ह्या जिवरक्षकांनी गणपतीची मुर्ती विसर्जीत करपाक भाविकांक मजत केली. गोंयांत कांय घरांनी पांच, सात वा इकरा दीस गणपतीची पुजा जाता. जाल्यार भौशीक मंडळाचे गणपती 11 ते 21 दिसांचें आसतात. ह्या काळांत सांस्कृतीक कार्यावळींचें आयोजन करतात. विसर्जन सुवाळ्या खातीर जिवरक्षक 17 सप्टेंबर मेरेन तैनात केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
