भांगरभूंय | प्रतिनिधी
2050 मेरेन देशांत जाण्ट्यांचो आंकडो वाडटलो
नवी दिल्ली, खबरां संस्था ः देखरेखीची अर्थवेवस्था फकत पाळणाघरा मेरेन मर्यादीत आसूंक फावना, कारण हाका लागून देखरेख अर्थवेवस्थेच्या अर्थीक परिणामा कडेन आडनदर जाता. देखून गुंतवणूक आकर्शीत करपा खातीर देखरेख अर्थवेवस्थेक एक वेवसाय म्हणून पळोवचो, अशें मत केंद्रीय बायलां, बालविकास आनी अल्पसंख्यांक वेव्हार मंत्री स्मृती इराणी हांणी उक्तायलें. मजगतीं, 2050 मेरेन देशांतल्या जाण्ट्यांचो आंकडो वाडटलो अशेंय तांणी सांगलें. कॉन्फेडरेशन ऑफ इंडियन इंडस्ट्री (सीआयआय) वतीन आयोजीत केल्ल्या ‘देखभाल अर्थव्यवस्था : संधी खुल्या करणे’ ह्या विशयाचेर घेतिल्ल्या परिशदे वेळार ती उलयताली.
भारतांत देखरेख अर्थवेवस्थेच्या धोरणाची गरज स्पश्ट दिसता. कारण भारताची लोकसंख्या शास्त्रीय परिस्थिती 2020 ते 2050 मेरेन बदलपाची शक्यताय आसा. हाका लागून भुरग्यांची जतनाय घेवपाची पातळी तिगोवन दवरतना जाण्ट्यांची चड जतनाय घेवप गरजेचें आसा. फुडल्या कांय दशकांत लोकसंख्या वाडटलीच, पूण लोकसंख्येचें संक्रमणूय जातलें. 2050 वर्सा मेरेन जाण्ट्या लोकांचें प्रमाण लोकसंख्येच्या 20.8 टक्के म्हणल्यार सुमार 347 दशलक्ष लोकां मेरेन वाडटलें असो अदमास आसा. तशेंच भुरग्यांचें प्रमाण किरकोळ 18 टक्क्यांनी उणें जालें तरी भुरग्यांचो आंकडो 300 दशलक्षच्या लागीं आसतलो.
जानेवारी ते डिसेंबर 2019 ह्या काळांत राष्ट्रीय सांख्यिकी संघटनेन (एनएसओ) केल्ल्या वेळ वापर सर्वेक्षणाच्या आंकड्यां प्रमाण, काम करपाच्या पिरायेचेर (15 – 59 पिराय) आशिल्लीं बायलां जिवीतांतलीं जायतीं वरां पगार नाशिल्ल्या कामांत घालयतात, जाल्यार दादले चडसो वेळ पगार मेळपी कामांत घालयतात. विकसीत भारत @2047 त बायलांच्या फुडारपणा खाला उदरगतीची नदर साकार करपाक देखरेख अर्थवेवस्थेचे पुनरुज्जीवन करप म्हत्वाचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
