भांगरभूंय | प्रतिनिधी
प्रधानमंत्री अटलबिहारी वाजपेयील्या मंत्रिमंडळात पर्यटन आणि सांस्कृतिक मंत्रीपद तशेंच फुडें परराष्ट्र व्यवहार खात्याचें मंत्रीपदूय सांबाळ्ळें.
हिंदी चित्रपटसृश्टींतलो अभिनेतो आनी राजकारणी विनोद खन्नाचो जल्म 6 आॅक्टोबर 1946 दिसा पेशावर पाकिस्तांनात जालो. फाळणी जाले उपरांत तांगेलें कुटुंब मुंबयंत आयलें. बापायलें नांव किसनचंद आनी आवय कमल. बापूय कपडे आनी रसायनांचो वेवसायिक आशिल्लो. विनोद खन्नान मुळावें शिक्षण मुंबयतल्या सेंट मेरी स्कूलांत पुराय केल्ले. 1960 उपरांत फुडलें शिक्षण नासकांतल्या बर्नेस स्कूल हे निवासी शाळेंत केलें. फुडें मुंबयतल्या सिडनहॅम कॉलेजींतल्यान ताणें पदवी घेतली. विनोद खन्नाक हिंदी, मराठी, इंग्लीश, पंजाबी ह्यो भाशा उलोवंक येताल्यो.
शाळेच्या काळांत अभिनया संबंदीत कार्यावळींनी वाटेंकार जाल्यांन तागेली अभिनया मदली आवड खुब वाडिल्ली, पूण ह्या मळार कारकीर्द करपाक तागेल्या घरच्यांचो खर विरोध आशिल्लो. विनोद हो विज्ञानाचो विद्यार्थी. हुशार. ताका ह्या मळार अभियंतो जावपाची इत्सा आसली, पूण ताच्या बापायक ताणें काॅमर्स शिकून घरचो वेवसाय हातांत घेवचो, अशें दिसतालें. ताचो बापूय सामको कडक मनीस आशिल्ल्यान दोगांय मदीं एके तरेचो तणाव आशिल्लो. कॉलेजींत आसतना ताका सप्तकाच्या शेवटाक पार्टी करपाक बापाय कडल्यान परवानगी घेवची पडटाली. तशेंच ताच्या बापायन ताका विचारिनासतना मुंबयच्या वाणिज्य महाविद्यालयांत ताचें नांव घाल्लें.
विनोद खन्नाच्या बऱ्या रुपान आनी एक संयोगान ताका फिल्मांनी येवपाचो मार्ग मेळ्ळो. मुंबयचे एके मेजवानींत सुनील दत्ता कडेन तागेली भेट घडली. दत्त आपलो धाकटो भाव सोम दत्त हाचे वांगडा फिल्माची येवजण आंखतालो. तातूंत दोन नायक आशिल्ले. सुनील दत्त हांणें मन का मीत (1968 ) ह्या सिनेमांतल्यान विनोद खन्नाक पयली संद दिली. तातूंन ताणें खलनायकाची भूमिका साकारिल्ली. पूरब और पश्चिम, सच्चा झुठा, आन मिलो सजना, मस्ताना, ऐलान सारख्या सिनेमातल्यान ताणें खलनायकाच्यो भूमिका केल्यो.
हम तुम और वो (1971) हो नायक म्हणून तागेलो पयलो सिनेमा. उपरांत गुलजार हांगेली कथा, पटकथा आनी दिग्दर्शन आशिल्लो मेरे अपने (1971) हो बंगाली आपनजन वयल्यान हिंदींत केल्लो हो सिनेमा विनोद खन्ना खातीर म्हहत्त्वाचो थारलो. तातून ताणें श्याम ह्या तरणाट्याची भूमिका केल्ली. सिनेमा बरोच गाजलो. मुखार गुलजार हांगेल्या अचानक (1973) या चित्रपटात ताणें रणजित खन्ना या प्रामाणिक, करारी लश्करी अधिकाऱ्याची भूमिका केली. ह्या टप्प्यार विनोद खलनायकाच्यो भुमिका सोडून नायकाच्यो भूमिका करपाक लागलो. नायक वा सहनायक अशो भूमिका साकारत ताणें आपली येसस्वी वाटचाल कायम दवरली.
फरेबी, हत्यारा, आप की खातीर, राजमहल, द बर्निंग ट्रेन, इम्तिहान, खून पसीना, मेमसाब, प्रेम कहानी, इन्कार, कुर्बान, दयावान, हेराफेरी, अमर अकबर अँथनी, हाथ की सफाई, इन्सान, नेहले पे देहला, रेश्मा और शेरा, सरकारी मेहमान, दौलत, लेकिन, मीरा, हमशकल, शंकर शंभू, आरोप, परिचय, एक हसीना दो दिवाने अश्या चित्रपटांल्यान ताणें आपल्या अभिनयाची छाप दाखयली. प्रकाश मेहरा दिग्दर्शित हाथ की सफाई (1975) ह्या सिनेमांत रणधीर कपूरा सयत विनोद खन्ना सहनायक आशिल्लो. एकेवटेन तस्करी करपी तर दुसऱ्या वटेन मोगाळ घोव अशी भूमिका ह्या सिनेमांत ताणें साकारली. प्रकाश मेहराच्याच ‘मुकद्दर का सिकंदर’ (1978) चित्रपटात अमिताभ बच्चन हाचो इस्ट विशाल आनंद ह्या वकिलाची विनोद खन्नान केली. तागेल्या कारकिर्दीतलो हो एक लोकप्रीय सिनेमा. राखी, विनोद खन्ना आनी अमिताभ बच्चन हांच्या मोगाचो त्रिकोण ह्या सिनेमांत पळोवंक मेळटा. अमिताभ आनी विनोद खन्नाली पड्ड्या वयली इश्टागत प्रेक्षकांक खुब आवडली. विशाल या पात्रा खातीर विनोद खन्नाक फिल्मफेअराचें सर्वश्रेष्ठ सहायक अभिनेत्याचें नामांकन मेळळें. सामकी डौलदार चाल, भेदक नजर आनी आत्मविस्वास आशिल्ली कुडीची भास हें विनोद खन्नाल्या व्यक्तिमत्त्वाचें विशेश. विनोद खन्ना अभिनय क्षेत्रात कार्यरत आसतना लता मंगेशकर हांणी तयार केल्लो आनी गुलजारान दिग्दर्शीत केल्लो ‘लेकिन’ हो विनोद खन्नाच्या कारकिर्दींतलो आनीक एक उल्लेखनीय चित्रपट. विनोद खन्नान गीतांजली हिचे कडेन लग्न केलें. तांकां अभिनेतो अक्षय खन्ना आणि राहुल खन्ना हे दोन चले.
विनोद खन्ना लोकप्रियतेच्या तेंगशेर आसतना (1982) चित्रपट मळार वेल्यान ताणें अचकीत रजा घेतली आनी आचार्य रजनीशाचें शिश्यपद स्वीकारलें. उपरांत तो पांच वर्सां अमेरिकेत ओशो रजनीश हांगेल्या आश्रमात रावले.1985 त परत मुंबयंत येतकूच गीतांजली वांगडा घटस्फोट जालो. 1990 सालांत ताणें कविता दफ्तरी कडेन दुसरें लग्न केलें. विनोद आनी कविता खन्ना हांकां साक्षी आनी श्रद्धा खन्ना ह्यो दोन चलयो आसात.
1987 त विनोद खन्नान चित्रपटसृश्टेंत इन्साफ सिनेमांतल्यान परतून आगमन केलें. फुडें ताणें सत्यमेव जयते, महासंग्राम, क्षत्रिय, कारनामा, रिहाई, बटवारा, चांदनी सिनेमांत भूमिका साकारल्यो. 1997 सालांत ताणें हिमालयपुत्र या चित्रपटाची निर्मिती केली. या चित्रपटाक चलो अक्षय खन्ना हाणें नायकाची भूमिका केल्ली. मागीरच्या काळांत विनोद खन्नान वाँटेड, दबंग, रेड अलर्ट द वॉर विदिन चित्रपटांत चरित्रभूमिका साकारल्यो. रोहित शेट्टी दिग्दर्शित ‘दिलवाले’ हो तांचो प्रदर्शित जाल्लो निमणो सिनेमा.
विनोद खन्ना सिनेमां सयत राजकारणातूय सक्रिय आशिल्लो. 1997 सालांत ताणें भारतीय जनता पक्षात प्रवेश केल्लो आनी पंजाबातल्या गुरुदासपूर मतदार संघांतल्यान तीन वेळा खासदार म्हणून वेंचून आयलो. प्रधानमंत्री अटलबिहारी वाजपेयील्या मंत्रिमंडळात पर्यटन आणि सांस्कृतिक मंत्रीपद तशेंच फुडें परराष्ट्र व्यवहार खात्याचें मंत्रीपदूय सांबाळ्ळें.
विनोद खन्नाक जायते पुरस्कार मेळ्ळे. हात की सफाई ह्या चित्रपटा खातीर ताका उत्कृश्ट सहाय्यक अभिनेत्याचो फिल्मफेयर पुरस्कार फावो जालो. 2000 वर्सा ताका सिनेमांतल्या खाशेल्या योगदाना खातीर फिल्मफेयर लायफटायम अचीवमेंट पुरस्कार दिवन भोवमान केलो. विनोद खन्नाक ताच्या चित्रपट कारकिर्दी खातीर मरणाउपरांत दादासाहेब फाळके पुरस्कार दिवन भोवमान केलो.
27 एप्रिल 2011 वर्सा विनोद खन्ना मुत्राशयाच्या कॅन्सराक लागून पिरायेच्या 70 वर्साचेर संवसाराक अंतरलो.
——————————–
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
