‘दृश्यमां’तलो इन्स्पेक्टर : कमलेश सावंत

भांगरभूंय | प्रतिनिधी

 “हांव खंयच्या कोनांतल्यान नायक कसो दिसना. संघर्श करतना स्वताची राखण करप म्हत्वाचें, देखून चरित्र भुमिकाच म्हाका फावो.” अशें कमलेश स्पश्टपणान सांगता.

कलाकार

मूळ मलयाळम ‘दृश्यम’ सिनेमा (2013) जीतू जोसेफ हाणें दिग्दर्शीत केल्लो. फुडें 2015 वर्सा निशिकांत कामत हाणें तो हिंदींत हाडलो. ह्या ‘दृश्यमा’त अजय देवगण, तब्बू आनी श्रीया सरण हांणी मुखेल भुमिका केल्यात. कांय पात्रांय गाजलीं, तातूंतलें इन्स्पेक्टर गायतोंडे हें पात्र रंगोवपी कलाकार म्हणल्यार कमलेश सावंत.

ताचो जल्म 12 जून 1974 दिसा मुंबयच्या लालबाग- काला चौकी वाठारांत जालो. बापूय तुकाराम विठ्ठल सावंत रेल्वेंत काम करतालो आनी खेळां सचीवूय आशिल्लो. पांच भावंडां मदीं कमलेश धाकटो. ताका तीन भयणी आनी एक व्हडलो भाव. कमलेश रावतालो ते चाळींत चवथी वेळार सांस्कृतीक कार्यावळी जाताल्यो. तातूंत तो कलाकारांची नक्कल करतालो. नाटकांनीय वांटो घेतालो.  नाटककार विजय खानविलकर आनि कमलेशाचो बापूय इश्ट. खानविलकर महाराष्ट्र कामगार कल्याण केंद्र साने गुरूजी नांवाचे नाट्य संस्थे खाला नाटकां सादर करतालो. कमलेशाचे बाप्पायन ताका विजयाच्या हातांत दिलो. ताचे वांगडा रावून कमलेश नाटका संबंदीत जायते बारकावे शिकलो. ‘हणम्याची मरी आय’ नाटकांत तो पयलीं बबन्या नांवाची भूमिका करतालो. मागीर कास्टींग पळयतालो. त्या नाटकांत जगल्या महाराज ह्या खलनायकाच्या पात्राक कांय संस्कृत संवाद आशिल्ले. ते योग्य रितीन उलोवंक शकपी असो अभिनेतो मेळूंक नाशिल्लो. कमलेशान जायत्या कलाकारांची चांचणी घेतिल्ली. येसाय मारतना कमलेशाक ते सगले संवाद तोंडपाठ जाल्ले. कारण कमलेशान शाळेंत संस्कृताचो अभ्यास केल्लो. 

विजय खानविलकराक हे विशीं कळ्ळें तेन्ना ताणें थारायलें की आतां जगल्या महाराजाचें पात्र फकत कमलेश सावंतच करतलो. आनी अशें तरेन कमलेशाक नाटकांत पयलो व्हडलो ब्रेक मेळ्ळो. फुडें राज्य नाटक सर्तींत ह्या नाटकाक पयलें इनाम मेळ्ळें. ह्या नाटकाचेर ‘श्रद्धा’ नांवाचें टीव्ही नाटक त्या काळांत लोकप्रीय जालें. ह्याच नाटका वरवीं अभिनेतो सयाजी शिंदे हाणें टिव्ही कारकिर्दीची सुरवात केली.  खानविलकाराच्या ‘लालबाग का राजा’ ह्या चित्रपटांत कमलेश सावंत मुखेल सहाय्यक आशिल्लो. ह्याच काळांत ताका चित्रपट निर्मितीचें तंत्रीक गिन्यान मेळ्ळें. कमलेशान णव वर्सांत णव नाटकांनी काम केलें. वेवसायीक अभिनय कारकिर्दीची सुरवात ‘गुब्बारे’ नांवाच्या टिव्ही शोंत जाली. जातूंत तो रेल्वे पुलिशेचो कर्मचारी आशिल्लो. 

गुब्बारे उपरांत कमलेशाक झी टिव्हीच्या ‘Thirller At 10’ च्या कांय एपिसोडांनी काम करपाची संद मेळ्ळी. तातूंतय ताणें उपनिरिक्षकाची भुमिका केल्ली. हाचे उपरांत सोनी टीव्हीच्या ‘अचानक 37 साल बाद’ ह्या शोंतय ताणें पुलिसाचो रोल केलो. ताच्या पात्राचें नांव इन्स्पेक्टर वंशी. ‘खाकी’ सिनेमाचे पटकथाकार श्रीधर राघवनाक कमलेशाचो अभिनय इतलो आवडलो की ‘खाकी’ चित्रपटांत ताणें कमलेशा खातीर वेगळी भुमिका बरयली. 2004 वर्सा प्रदर्शित ‘खाकी’ तल्यान हवालदाराचे भूमिकेंतल्यान कमलेशान हिंदी मळार पावल दवरलें. 

ताचो दुसरो चित्रपट म्हणल्यार 2004 वर्सा प्रदर्शीत जाल्लो ‘दीवार’. ताच्या पात्राचें नांव नायर. तिसरो चित्रपट फॅमिली, टायज ऑफ ब्लड, जो 2006 वर्सा आयलो. अशे तरेन कमलेशाक सुरवेकच ‘स्टार ऑफ द मिलेनियम’ अमिताभ बच्चना वांगडा फाटोफाट 3 फिल्मांनी काम करपाची संद मेळ्ळी. 2008 वर्सा निशिकांत कामत हाच्या ‘मुंबय मेरी जान’ ह्या चित्रपटांत ताणें पुलिसाची भुमिका केली. ताचो पयलो मराठी चित्रपट ‘देसरुढ एक परंपरा’. 2005 वर्सा तो लागलो. 

कमलेशान आतां मेरेन रायट ऑर रॉंग, फोर्स, चक्रधर, कल किसने देखा, भूतनाथ रिटर्न्स, डोंगरी का राजा, मेरे देश की धरती, कोई जाने ना ह्या चित्रपटांनी काम केलां.  ताचो सगळ्यांत बरो चित्रपट म्हणल्यार 2015 वर्सा प्रदर्शीत जाल्लो ‘दृश्यम’. तातूंत तो इन्स्पेक्टर गायतोंडेचे भुमिकेंत दिसलो.  इन्स्पेक्टर गायतोंडे ह्या पात्राक कमलेशान पुराय न्याय दिला. कारण गायतोंडेक सिनेमाच्या पड्ड्याचेर पळयले उपरांत लोक ताचो इतलो दुस्वास करपाक लागले की वास्तव जिणेंत लेगीत कांय जाण कमलेशाचेर राग उक्तायताले. जायत्या जाणांनी ताका फोन करून गाळयो लेगीत संवल्यो. कमलेश सावंताक रसिकांनी दिल्ली ती पावती.

दृष्यम सिनेमांतले इस्पेक्टर गायतोंडेले लोकप्रीय संवाद “हर कुत्ते का दिन आता है… मैं कुत्ता तो नहीं पर आज दिन मेरा है।”“मैं अपनी बीवी का बर्थडे भूल सकता हूं, पर 2‑3 ऑक्टोबर को क्या हुआ ये नहीं भूल सकता।” .हाचे उपरांत हें गायतोंडेचें व्यक्तिमत्व परतून 2022 वर्सा ‘दृष्यम 2’ ह्या सिनेमांत प्रेक्षकां मुखार आयलें.

ताच्या लग्नाचीय एक काणी आसा. ताची घरकान्न सपना मुंबयच्या सिद्धार्थ कॉलेजींत शिकताली. कमलेश इश्टां वांगडा ते कॉलेजींत नाटकां सादर करपाक वतालो. एक दीस एका इश्टा वरवीं सपनाची वळख जाली. सुरवेक कमलेश आनी सपना फकत इश्ट आशिल्ले. पूण थोड्या दिसांनी कमलेशाक सपना आवडपाक लागली. पूण सपनाक तें सांगपाचें धाडस ताका जालें ना. ताणें इश्टा वरवीं त्यो भावना सपनाक कळयल्यो. तिणें हयकार दिलो, पूण लग्न जावचे पयलीं सपनाक कारकीर्द घडोवपाची इत्सा आशिल्ली. करियर थीर जातकूच लग्न करचें अशें दोगांयनी थारयलें. काळ गेलो आनी कमलेश प्रस्थापित अभिनेतो जालो. सपना एअर इंडियांत एअर होस्टेस जाली. मागीर 12 वर्सां चलपी मोगाचे रुपांतर लग्नांत जालें. आयज सपना उद्देजक जाल्या. दोगांयकय 8 वर्सां पिरायेची स्वरा नांवाची धूव आसा. 2017 वर्सा कमलेशाक ‘झाला बोभटा’ त विनोदी भुमिके खातीर महाराष्ट्र राज्य चित्रपट पुरस्कार फावो जालो. ‘मी शिवाजी राजे भोसले बोलतोय’, ‘मला काहीच प्रॉब्लेम नाही’ आदी चित्रपटूय ताणें केल्यात. “हांव खंयच्या कोनांतल्यान नायक कसो दिसना. संघर्श करतना स्वताची राखण करप म्हत्वाचें, देखून चरित्र भुमिकाच म्हाका फावो.” अशें कमलेश स्पश्टपणान सांगता.

————————————–

सुदिन वि. कुर्डीकार