भांगरभूंय | प्रतिनिधी
पणजी: मोबोर दर्यादेगे लागसारा दर्यांत सुमार १५० मीटर भितर गेल्ल्या आनी दर्यादेगेर परत येवपाचो यत्न करपी एका नुस्तेंमार्याक दृश्टी मरीनच्या लायफ सेवर्सनी वाटयलो.
ही घडणूक आयतारची. सुमार २० ते २५ नुस्तेंमार मोबोर दर्यादेगे लागसारच्या फातरां कडेन पेयताले. ह्या नुस्तेंमार्यां मदलो एकलो अचकीत खोल दर्यांत वोडत गेलो. ताच्या वांगड्यांनी थंयच आशिल्ल्या लायफसेवर मेघा वेळीप हांकां रोखडेंच हे घडणुके विशीं कळयलें. मेघा वेळीप हांणी रोखडेंच मोबोर वॉच टॉवराक हे विशीं शिटकावणी दिली.
वाटावपाचे मोहिमे खातीर मोबोर आनी केळशी ह्या दोनूय दर्यादेगां वेल्यान दरेकी एक अश्यो दोन जेटस्की रोखड्योच व्हेल्यो. उदकांत सुमार १५० मिटर भितर बुडपी नुस्तेंमारी दिसून आयलो. लायफ सेवर लवू गांवकार हांणी जेटस्कीचे मजतीन ताका रोखडोच उदकांतल्यान भायर काडलो आनी मोबोर टॉवर मेरेन सुरक्षीत हाडलें.
नुस्तेंमार्याक वाटयले उपरांत ताका स्वास घेवपाक त्रास जाताले. ताका रोखडोच रिकव्हरी पोझिशनांत दवरलो आनी ऑक्सिजन दिलें. उपरांत ताका १०८ अँब्युलन्स सेवेचे मजतीन हॉस्पिसिओ हॉस्पिटल, मडगांव भरती केलो. सध्या ताची भलायकी बरी आसा.
दर्यांत पेवपा खातीर प्रतिकूल परिस्थिती निर्माण जाल्ल्यान सध्या गोंयच्यो सगल्यो दर्यादेगो मान्सूनच्या काळांत पेवपा खातीर बंद दवरल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
