भांगरभूंय | प्रतिनिधी
आमचे भोंवतणी जायते दिश्टीदोश आशिल्ले लोक आसात. कांय जाण पुरायपणान दिसनाशिल्ले आनी कांय जाण उणी नदर आशिल्ले. हें अपंगत्व चड करून ‘अदृश्य’ आसता, ताका लागून आमी असो समज करून घेतात की सगळे आमचे सारकें पळोवपाक शकतात. पूण तशें न्हय. देखूनच दिसता त्या लोकांच्या नदरेक कांय म्हत्वाच्यो गजाली येनात, ज्यो दिसनाशिल्ल्या लोकांचे सुरक्षे खातीर गरजेच्यो आसतात.
गाडी चलयतना सायड लायटीचो आवाज वा रिव्हर्स करतना आवाज करप हें नदरेक दिश्टी नाशिल्ल्या मनशां खातीर खूब म्हत्वाचें. हालींच जाल्ल्या अपघातांत बस फाटीं सरतना शिटकावणी दिवंक नाशिल्ल्यान दोळे सारके नाशिल्लो एक मनीस गंभीर जखमी जालो. ह्या ल्हान- ल्हान चुकांक लागून कुड्ड्यांक व्हड धोको निर्माण जावंक शकता. कदंबच्या बशींत ऑडियो आसता. दर एका स्टाॅपार खंयचो स्टाॅप आसा तें सांगतात, पूण हो आवाज कांय दीस येता आनी कांय दीस बंद जाता. कोण दिश्टीहिन आसा? कोणाक हाची गरज आसा? अशें लोकांक दिसता. पूण दिश्टीहिन भुरगीं वा जाण्टे दर दिसा बशींतल्यान प्रवास करतात. हो आवाज आसल्यार बस खंय पावल्या तें सगळ्यांक समजता. पूण हो आवाज बंद आसल्यार तांकां हेर लोकांचेर आदारून रावचें पडटा. म्हजी कदंबाच्या कर्मचाऱ्यांक विनंती करतां की ऑडिओ आशिल्लीं इलेक्ट्रीक बस सदांच चालू दवरात. म्हणजे खंयच्याय वेळार दिश्टीहिन मनीस बशींत बसता तेन्ना ताका बस खंय पावल्या हें कळटलें.
दिश्टीहिन लोक आपले दिसपट्टे हालचाली खातीर आनी येरादारी खातीर धवे बडयेचो उपेग करतात. तें पळोवन लोकांनी आपलीं वाहनां थांबोवची. रस्तो हुंपपाक तांकां आदार करचो. आवाज ही तांची नदर. देखून दरेकल्यान दिश्टीहिनाचो विचार करून तांची सुरक्षीतताय आनी स्वातंत्र्य तिगोवन दवरचें. ह्या ल्हान- ल्हान कृतींनी आमी सगळ्यांनी एकठांय येवन चड समावेशक आनी सुरक्षीत समाज तयार करूं येता. आमी दिश्टी पडनाशिल्ल्या लोकांच्या गरजांचो मान राखुया आनी तांचे सुरक्षेक योगदान दिवया.
महादेव दयानंद सावंत
नॅशनल असोसिएशन फॉर द ब्लाइंड शाखेचो वांगडी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
