दूद तापोवन पियेवचें काय तापय नासतना?

भांगरभूंय | प्रतिनिधी

जल्माक आयिल्लीं भुरगीं आनी व्हडले मनीस हांचे खातीर दुद हें एक पोशक अन्न. नवजात भुरगें हेर खाणां खावंक ये मेरेन दुदाचेर आदारून आसता. दुदांत 74 टक्के उदक आनी उरिल्लें घन घटक आसतात. तातूंत प्रथिनां, कॅल्शियम, जीवनसत्व डी, खनिजां, फॅटी एसिडस भरपूर प्रमाणांत आसतात. पूण, जेन्ना आमी दूद तापयतात तेन्ना ताच्या पोशण मोलांत बदल जातात. दुद उकळ्ल्या उपरांत तातूंतले जायते पोशक घटक मरतात. ताका लागून दुदाचो दर्जो इबाडटा, अशें जायत्या जाणांचें मत. कच्च्या दुदांत बॅक्टेरिया नेटान वाडटात, जाका लागून दुयेंसांचो धोको वाडटा. देखून कच्चें दूद वा तापयिल्लें दूद आमचे भलायके खातीर बरें आसा काय वायट, असो प्रस्न उप्रासता.
कच्च्या दुदाचे फायदे
‘हेल्थ लायना’च्या मतान कच्च्या दुदांत उकळिल्ल्या दुदा परस चड पोशक तत्वां आसतात. लॅक्टोज, दमो, ऑटोइम्युन आनी एलर्जी आशिल्ल्या लोकांक दूद तापय नासतना पियेवप फायदेशीर. देखून तें भलायके खातीर फायदेशीर ना अशें म्हणप चुकीचें.
ह्या दुदांत पोशक तत्वां आनी उदकाचें प्रमाण चड आसता. हाका लागून तातूंत खूब बेगीन बॅक्टेरिया जावंक शकता. देखून वेगवेगळ्या दुयेंसांचो धोको वाडटा. संशोधकांच्या मतान हाका लागून कच्चे दूद रोखडेंच इबाडटा, जें फुडें विख पसून जावंक शकता. हें दूद पियेल्यार वेगवेगळीं दुयेंसां जावंक शकतात. खास करून गुरवार बायलो, ल्हान भुरगीं, जाण्टे लोक ह्या बॅक्टेरियाच्या संपर्कांत आयिल्ल्यान दुयेंत पडूं येतात.
तापयल्ल्या दुदाचे फायदे
दूद उकळटात तेन्ना तातूंतले जायते पुश्टीक घटक बदलतात. ताचीं प्रथिनां आनी जीवनसत्वां उणीं जावंक लागतात. अशे तरेचे दूद पियेवपाचे फायदे आनी लुकसाण अशे दोनूय प्रकार आसात. पूण जेन्ना आमी दूद तापयतात तेन्ना तातूंतलें रायबोफ्लेविनचें प्रमाण खूब उणें जाता. हीं प्रथिनां पचपा सारकीं आसतात. पूण तुमकां ल्हान आनी मध्यम सांखळेंतली चरबी चड प्रमाणांत मेळटली. लॅक्टोज इंटॉलरेंस वा दुदाची एलर्जी आशिल्ल्या लोकांक उकळिल्ल्या दुदाक लागून त्रास जावचो ना.
सदांच दुद तापयले उपरांत पियेवप बरें अशें जायत्या अभ्यासांतल्यान दिसून आयलां. पूण तें तापयतना एक गजाल मतीत दवरची, ती म्हणल्यार सदांच मंद उज्याचेर दुद गरम करचें आनी उकळ्ळे उपरांत गॅस बंद करचो. दूद चड तापयत जाल्यार ताचें पोशण मोल उणें जाता. ताका लागून दूद परत परत तापोवचें न्हय.