भांगरभूंय | प्रतिनिधी
सुण्याची शेंपडी सरळ करपाक कितलीय नळयेंत घाली म्हूण ती निमणी वाकडी ती वाकडीच, अशें म्हणटात. आमचो देश स्वतंत्र जायत सावन साबार संस्था, म्हामंडळां, सरकारी उपक्रम, व्हडल्यो कंपनी, खेळां मंडळां…. हातूंत भ्रश्टाचाराचीं कितलींशींच प्रकरणां सांपडल्यांत. भ्रश्टाचाराचे दोंगराचे दोंगर. सरकारीच न्हय, तर निमसरकारी आस्थापनांनीय हें घडलां. सगलेच कडेन सरकाराच्यो नेमणुको आसताच अशें ना. वेंचणुके वरवीं आयिल्लीं संचालक मंडळां वेव्हार सांबाळटात, तरीय भ्रश्टाचार, गैरकारभाराची एखादी घडणूक घडटाच घडटा. कांय कंपनी मागीर लुकसाणांत चलतात वा उरिल्ल्यो सरकाराक अर्थीक धिगी लावन चलोवच्यो पडटात. कारण कामगारांचो प्रस्न आसता. काल गोंयच्या सहकार मळाचेर खवदळ घालपी घडणूक घडल्या. सहकार निबंधकान कुर्टी- फोंडेंच्या गोवा डेरींतल्या गैरकारभाराच्या आरोपा वयल्यान सध्याच्या आनी आदल्या मेळून 9 संचालकांक (कांय जाणांच्या मतान 14. निवृत्त जाल्लेय संचालक तातूंत आसात.) अपात्र थारायल्यात. तातूंत सध्याच्या मंडळांतलेय पोरूंच वेंचून आयिल्ले संचालक आसात. सध्याच्या संचालक मंडळा कडेन भोवमत उरूंक ना, म्हणटकच दिसपपट्टो कारभार करपाक सरकारान आतां तीन वांगड्यांची समिती नेमल्या. सहकार निबंधकांच्या ह्या एक- दोन निर्णयांक लागून गोवा डेरीक भेंड मोडना जाल्यार पुरो. कारण पयलींच दुदाचे बाबतींत गोंय स्वयंपूर्ण ना. डेरीची ही कामगिरी सुधारुंक ना जाल्यार गोंयचे सगलेच शेतकार (चड नात ते) भायल्या कंपनींच्या मोगांत पडटले आनी ताचो वायट परिणाम गोवा डेरीचेर जातलो.
अपात्र थारायल्यात ते संचालक मंडळ 2017 वर्साचें. दूद खरेदी करतना 6 कोटी रुपयांची भानगड जाल्या अशी कागाळ तेन्ना सहकार निबंधकां कडेन केल्ली. मागीर गोवा डेरी प्रशासकाच्या ताब्यांत गेली. पोरूंच नवें संचालक वेंचून आयिल्ले. ताचे पयलीं तांणी प्रशासकाचेर, कांय अधिकाऱ्यांचेर गंभीर आरोप केल्ले. 10 कोटीं परस चड म्हाल भायल्या राज्यांतल्यान विकत घेतला. पूण ताचें बिल अजून फारीक करूंक ना. कांय म्हाल बरो नाशिल्ल्यान परत धाडिल्लो. पूण ताचें पयशे (26 लाख?) दिल्यात, असो गंभीर आरोप पोरूंचे वेंचणुके पयलीं जाल्लो. आतां समितीक हें सगलें जाग्यार घालचें पडटलें. म्हयन्याची दूद विक्री 42 हजार लिटरांचेर पाविल्ली, ती नव्या संचालक मंडळाच्या काळांत 52 हजार लिटरांचेर गेल्ली खंय. मजगतीं, अस्तंमते अध्यक्ष राजेश फळदेसाय हांणी सहकार मळ, लोकशायेचेर हो घाव अशी खर प्रतिक्रिया उक्तायल्या. तांणी गंभीर आरोप केल्यात, ते म्हणल्यार गोवा डेरीची संजिवनी साकर कारखान्या सारकी परिस्थिती जातली! डेरींतल्यान निवृत्त जाल्ली एक व्यक्ती हो डाव खेळटा. दूद उत्पादकांचेर परिणाम जातलोच, पूण एके खाजगी कंपनीक हाचो भरपूर फायदो जातलो. तेच खातीर हें केलां जावये, असो तांकां दुबाव आसा. फळदेसाय न्यायालयांत वचपाचे आसात, पूण ताचे पयलीं कृशी मळा वयल्या तज्ञांनी, कृशी अधिकाऱ्यांनी हातूंत लक्ष घालपाक जाय. जे न देखे रवी, ते देखे कवी, अशें म्हणटात. पूण, कृशी मंत्री रवी नायक हांकां गोवा डेरींत कितें चल्लां तें खबर आसतलेंच! डेरी तांच्या शेजराच तर आसा.
गोंय सरकारान कामधेनू येवजण, कृशी मळा वयल्यो हेर येवजण्यो नेटान चालीक लावन गोंय स्वयंपूर्ण करपाचो हावेस उक्तायला. गोंय पाचवेचार करपाक सोदतना अचकीत गोवा डेरी परत कुटपाक लागली, जाल्यार ताचो कृशी मळाक फटको बसतलो. गोंयचे शेतकार दुदाक चड मोल मेळटा थंय वतले. तेन्ना ही डेरी आनी तिचो कारभार शक्य तितले बेगीन जाग्यार घालपाची गरज आसा. संजीवनी, कदंब येरादारी मंडळ सारको दर वर्सा गोवा डेरीकूय अर्थीक डोस दिवपाचो वेळ येवपाक जायना. सहकार निबंधकान पावलां उखल्ल्यांत म्हणजे खंय तरी करपल्ल्याचो दुर्गंध येता आसतलो. अपात्र संचालकांनी ह्या प्रकरणांत न्यायालयाचीं दारां धाडावपाचें थारयलां. बरी गजाल. दूद का दूद, पानी का पानी जावंदी.
सध्या तरी डेरीचेर परत प्रशासक आयला. फाटल्या प्रशासकाच्या काळांत संचालक मंडळान आरोपाचेर आरोप केल्ले. तशें आतां जावचें नात, हाची खबरदारी नवे समितीक घेवची पडटली. आदलीं बिलां फारीक करपाचीं आसात, दुदाचें उत्पादन वाडोवपाचें आसा. बरोच घाम गळोवचो पडटलो, अशें दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
