दूदसागर न्हंये वयलो बंधारो वादाच्या भोवऱ्यांत दोनूय वटेच्या गांवांतल्या लोकांचो विरोधः मुंडकाराक केलो सुवातेचो धनी 

भांगरभूंय | प्रतिनिधी

भांगरभूंय । प्रतिनिधी
फोंडेंः उसगांव- गांजें आनी कुर्टी- खांडेपार पचायत वाठारांतल्यान व्हावंपी दूदसागर न्हंयेचेर बांधपाक येवपी बंधारो  सध्या वादाच्या भोंवऱ्यांत सांपडला. न्हंयचे दोनूय देगेर आशिल्ल्या गांवांतले  लोक बंधारो बांदपाक विरोध करतात. तातूंत उदकास्रोत खात्याच्या अभियंत्यांनी केल्ल्यो जायत्यो त्रुटी आयताराक जाल्ले लोक सुनावणे वेळार लोकांनी उक्त्यो केल्ल्यान कायदेशीर सोपस्कार अभियंत्यां खातीर त्रासाच्या थारपाक शकतात. बंधारो बांदपा खातीर जमीन धन्याचे सुवातेर एका मुंडकाराची जमनीचो धनी म्हणून परवानग घेतिल्ल्याचें उक्ताडार आयलां.
सोनारबाग-उसगांव आनी  कुर्टी- खांडेपार पंचायत वाठारांत सुमार 100 कोटी रुपया खर्च बंधारो बांदपाची तयारी उदकास्रोत खात्यान चलयल्या. फाटल्या दोन वर्सां सांवन दोनूय गांवांतले लोक बंधारो बांदपाक विरोध करतात. मात उदकास्रोत खात्याच्या अभियंत्यांनी फाटल्या कांय दिसां सावन पुलीस संरक्षण घेवंन बंधाऱ्याचे सुवातेचें सर्वेक्षण करतात. दोनूय गांवांतल्या लोकांनी पंचायत ग्रामसभेंत बंधाऱ्याक विरोध करपी थाराव पास केल्यात. ताला लागून हें बंधाऱ्याचें प्रकरण जडार पडपाची शक्यताय आसा. म्हत्वाचें म्हणल्यार दोनूय वटेन आशिल्ल्या गांवांतली जायती घरां दूदसागर न्हंयेक हुंवार आयल्यार बुडटात. 2021 वर्सा आयिल्ल्या हुवांरांत जायती घरां मातयेभरवण जावपाचे प्रकार घडिल्ले. थळाव्या लोकांची घरां बुडटात तेन्ना उदकास्रोत खात्याचे अभियंते ह्या वाठारांत येनात. हुंवार येता तेन्ना आमदार- मंत्री व्हड्यांतल्यान फेरफटको मारून प्रसिद्धी घेतात असो दोनूय गांवांतल्या लोकांचोआरोप आसा. बंधारो बांदचे पयलीं थळाव्या लोकांची सुरक्षे खातीर कसली उपाय येवजण करतले तें जाहीर करपाक जाय अशी लोकांची मागणी आसा.
प्रियोळ मतदारसंघांतल्या लोकांचो पियेवपाच्या उदकाचो प्रश्न सुटावो करपा खातीर बंधारो बांदतात अशें अभियंते लोकांक सांगतात. मात ते खातीर बांदकाम खात्यान हाचे पयलींच गांजें -उसगांव हांगा 25 एमएलटीचो उदका शुद्धिकरण प्रकल्प उबारला. फुडल्या चार- पांच म्हयन्यांत ताचें लोकार्पण लेगीत करतले. मुर्डी हांगां बंधारो बांदून 30 एमएलडी उदकाची पुरवण प्रियोळ मतदारसंघांतल्या लोकांक करतले अशें उदकास्रोत खात्याचे अभियंते सांगतात. ताका लागून लोकां मदीं संभ्रम तयार जाला.  आयतारा हे संबंदी कांय थळाव्यांनी प्रश्न उपस्थीक केल्ल्यान अभियंत्यांनी फुडल्या 20 वर्साचें उदकाचें नियोजन करतात अशें सांगपाक सुरवात केली. समाधान करपी जाप मेळना देखून लोकांनी अभियंत्या विशीं नाराजी उक्तायल्या.
फुडाराक उदकाचो उणाव जावचो ना अशी म्हायती अभियंते दितात. तातूंत तथ्य आसा. कारण दूदसागर न्हंयचें उदक फोंडें आनी तिसवाडी तालुक्याक दितात. मात सध्या उदकाची पातळी उणी जायत आसा अशें दिसून येता. खणीच्या खंदकांतलें उदक फाटल्या कांय दिसां सावन दूदसागर न्हंयेत सोडटात आनी तशें करून ओपा उदका शुद्धिकरण प्रकल्पा कडेन उदकाची पातळी नियंत्रणांत दवोरतात. प्रियोळ मतदरासंघातल्या लोकां खातीर गांजे प्रकल्पांतल्यान 25 एमएलडी आनी मुर्डी हांगा बंधारो बांदून 30 एमएलडी उदकाची पुरवण करपाचो विचार लोकांक संभ्रमांत उडोवपी आसा. ताका लागून नवो बंधारो बांदून उदक नक्की खंय व्हरतले हाची जाव लोकांक अजून मेळपाक शकली ना. थळाव्या लोकांची घरां हुंवारांत बुडटना हेर लोकांक उदका पुरवण करपाचो यत्न थळावे लोक सोसून घेवचे नात हें स्पश्ट जालां.
मुर्डी आनी सोनारबाग वाठारांत व्हांवपी दूदसगार न्हंयेत नुस्ते आनी हेर उदका जीव नाशिल्ल्याचो अहवाल उदकास्रोत खात्याच्या अभियंत्यांनी सरकाराक सादर करून लोकांक खुबळावन घालपाचो यत्न केल्ल्याचें दिसून येता. कारण ह्या वाठारांत न्हंयेत व्हडा प्रमाणांत खुबे आनी तिसऱ्यो मेळटात. बरीच कुटूंबा खुबे आनी तिसऱ्यो विकून पोट भरतात. आयतारा जाल्ले लोक ,सुनावणे वेळार कांय बायलांनी आक्रमक पवित्रो घेंवन अभियंत्याक बंधारो बांदपाचो विचार सोडून दिवपाचें आवाहन केलें. हे सुनावणे वेळार थळावो पंच वांगडी अभिषेक गावडे हाणे पंचायत वाठारांतल्या एका मंडुकारा कडल्यान बंधारो बांदपाचे जमनीचो धनी म्हणून ताचे कडल्यान उदकास्रोत खात्यान परवानगी घेतल्या आनी खांडेपार वाठारांतल्या मुंडकारांची परवानगी घेतली ना हें उक्ताडार हाडलें. ताका लागून उदकास्रोत खातें बेकायदेशीरपणान बंधारो बांदपाचे तयारेंत आसा हे गावडे हाणे दाखोवन दिलें.
आयतारा जाल्ले सुनावणे वेळार सरपंच नरेंद्र गांवकार हाणे बंधाऱ्याक थळाव्या लोकांचो आशिल्लो विरोधा संबंदी उदकास्रोत आनी हेर संबंदीत खात्यांक अहवाल धाडटले अशें सागलें. कुर्टी- खांडेपार पंचायतीची सरपंच संजना नायक हिणेय ग्रामस्थांचो बंधारो बांदपाक विरोध आसा अशें सांगलें. थळावी पंचायत मंडळा लोकां वांगडा रावतलीं अशें तांणी सांगलां.

सोनारबाग वाठारांतल्या एका मुंडकारान जमनीचो धनी म्हणून उदकास्रोत खात्याक बंधारो बांदपाक परवानो दिला. मात 2 मे 2023 दिसा जमनीच्या खऱ्या धनीन उदकास्रोत खात्याक एक निवेदन सादर करून गैरवेव्हार जाल्ल्याचें स्पश्ट केलां. तशेंच मुर्डी वाठारांत उदकास्रोत खात्याच्या अभियंत्यांनी मुंडकारांची परवानगी घेनास्तना जमनीच्या धनया कडल्यान परवानगी घेतल्या अशें सांगलां. ताका लागून लोकां मदीं उदकास्रोत खात्याच्या अभियंत्या विशीं दुबाव तयार जाला.