भांगरभूंय | प्रतिनिधी
बंद खणींचें उदक ओडपाचे शिंपणावळ खात्याचे यत्न
भांगरभूंय । प्रतिनिधी
फोंडें: ओपा उदक शुद्धीकरण प्रकल्पा लागसार दूदसादर न्हंयेची पातळी उणी जाल्ल्यान शिंपणावळ खात्या वतीन बंद खणीचें उदक न्हंयेंत सोडपाचो यत्न सुरू केल्यात. सातोण- दाबाळ वाठारांतल्या बंद खणींचें उदक न्हंयेंत सोडपा खीतर पंप बसोवपाचें काम सुरू केलां. फुडल्या दोन दिसांनी ओपा प्रकल्पाक बंद खणींची उदका पुरवण जातली. सुमार 10 एमएलडी उदक दर दिसा न्हंयेंत सोडपाचो यत्न चल्ला.
ओपाप प्रकल्पांतल्यान तिसवाडी आनी फोंडें म्हालाक उदका पुरवण करतात. फाटल्या कांय दिसां सावन दूदसागर न्हंयेच्या उदकाची पातळी देंवता. ताका लागून कुळें वाठारांतल्या कांय बांदांचें उदक हे आदींच सोडिल्लें. पूण फाटल्यान दोन- तीन दिसांनी उदकाची पातळी आनीक देंविल्ल्यान अखेर शिंपणावळ खात्यान बंद खणांतलें उदक दूदसागर न्हंयेंत सोडपाचो निर्णय घेतला. सातोण- दाभाळ वाठारांतल्या झारापकार आनी पारकार खण कंपनीच्या बंद खणींचें उदक पंप लावन न्हंयेंत सोंडपाची प्रक्रिया सुरू केल्या. ते भायर कोडली वाठारांतल्या वेदांता कंपनीच्या बंद खणींतलें उदक पंप लावन दूदसागर न्हंयेंत सोडटले.
ओपा प्रकल्पांतल्या उदकाची पातळी नियंत्रणांत दवरचे खातीर कांय वर्सां सावन गांजे- उसगांवच्या म्हादय न्हंयेच्या उदकाची पायपलायनी वरवीं पुरवण करतात. फाटल्या म्हयन्यांत ते पायपलायनीचें कनेक्शन सुटिल्ल्यान शिंपणावळ खात्यान दुरुस्ती केल्ली. दुसऱ्याच दिसा पायपलायनीची दुरुस्ती करून ओपा प्रकल्पाची उदका पुरवण सुरू केल्ली.
बांदकाम खात्याच्या एका वरिश्ठ अभियंत्यान नांव जाहीर करचे न्हय हे अटीचेर दिल्ले म्हायती प्रमाण ओपा प्रकल्पाची उदकाची पातळी खऱ्यांनीच देंवत आसा. ताका लागून शिंपणावळ खात्याक बंद खणींतलें उदक सोडपाचे आदेश दिल्यात. हे संबंदांत अदीक म्हायती घेवपाचो यत्न केलो, पूण धारबांदोडें म्हालांतले शिंपणावळ खात्याचे सहाय्यक अभियंते सदानंद नायक मेळपाक शकले नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
