भांगरभूंय | प्रतिनिधी
खणींचेर चार पंप; दर दिसा 20 एमएलडी उदकाची पुरवण
भांगरभूंय । प्रतिनिधी
फोंडें: ओपा उदक शुद्धीकरण प्रकल्पा लागसार दूदसादर न्हंयेची पातळी देंविल्ल्यान शिंपणावळ खात्या वतीन बंद खणीचे उदक बुधवार सावन न्हंयेंत सोडपाक सुरवात केल्या. सातोण- दाबाळचे बंद खणीचेर एक जाल्यार कोडलीचे बंद खणीचेर तीन पंप बसयल्यात. ह्या चार पंपांतल्यान दिसाक 20 एमएलडी उदक दूदसागर न्हंयेंत सोडटले.
तिसवाडी आनी फोंडें म्हालाक उदक पुरवण ओपा प्रकल्पांतल्यान करतात. फाटल्या कांय दिसां सावन दूदसागर न्हंयेच्या उदकाची पातळी उणी जाल्ल्यान उदकाची समस्या निर्माण जावपाचें वाटेर आशिल्ली. शिंपणावळ खात्या वतीन बंद खणींतल्या उदकाची पुरवण करचे खातीर फाटल्या तीन- चार दिसां सावन पंप बसोवपाचें काम झुजा पांवड्यार चालू आशिल्लें. सातोण- दाभाळच्या झारापकार आनी पारकार खण कंपनींच्या बंद खणींचें उदक पंप लावन न्हंयेंत सोडपाची प्रक्रिया बुधवारा सकाळीं पुराय जाले उपरांत उदक पुरवण करपाक सुरवात जाली. ह्या वेळार धारबांदोडें म्हालांतले शिंपणावळ खात्याचे सहाय्यक अभियंते सदानंद नायक, कनिश्ठ अभियंते सागर नायक, थळावे पंच भोला गांवकार आनी रमाकांत गांवकार हाजीर आशिल्ले. सातोणच्या बंद खणींचें उदक न्हंयेंत सोडपा खातीर पंच रमाकांत गांवकार आनी भोला गांवकार हांणी म्हत्वाचें योगदान दिलां. ओपा प्रकल्पांतल्या उदकाची पातळी नियंत्रणांत दवरचे खातीर कांय वर्सां सावन गांजे- उसगांवचे म्हादय न्हंयेच्या उदकाची पायपलायनींतल्यान पुरवण करताले. पूण फाटल्या नोव्हेंबरा सावन गोंयांत पावस पडूंक नाशिल्ल्यान दूदसागर न्हंयेच्या उदकाची पातळी उणी जाल्ली. ताका लागून शिंपणावळ खात्या वतीन बंद खणींतलें उदक पंप लावन सोडपाक सुरवात केल्या.
ओपा प्रकल्पाची पातळी नियंत्रणांतः सदानंद नायक
बंद खणींचेर चार पंप लावन दर दिसा ओपा प्रकल्पाक सुमार 20 एमएलडी उदक उपलब्ध करून दिलां. ताका लागून ओपा प्रकल्पाची पातळी नियंत्रणांत येतली, अशें शिंपणावळ खात्याचे सहाय्यक अभियंते सदानंद नायक हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
